ގެއްލިގެން ހޯދަމުންދިޔަ މީހާ ރަހީނުކޮށް، އަނިޔާވެރިވެ އޭނާއަތުން ފައިސާ އަތުލާފައިވާކަމަށް ބެލެވޭ: ފުލުހުން
ގެއްލިގެން ހޯދަމުން ދަނިކޮށް ގެއަށް ދިޔަ އަންހެންމީހާ ،ރަހީނުކޮށް އޭނާއާމެދު އަނިޔާވެރި ޢަމަލުތައް ހިންގާ ފައިސާ އަތުލާފައިވާ ކަމަށް ބެލެވޭ ކަމަށް ފުލުހުން ވިދާޅުވެއްޖެއެވެ.
މާލެއިން ގެއްލިގެން ހޯދަމުންދާ ކަމަށް ފުލުހުން ރޭގައި އިއުލާނުކުރީ ރ. ކިނޮޅަސް، ލަގްޒަރީ، ޝިރުމީނާ އަބޫބަކުރު (33އ) އެވެ.
ފުލުހުން ބުނިގޮތުގައި ޝިރުމީނާ މިދިޔަ އޮކްޓޯބަރ މަހުގެ 31 ވަނަ ދުވަހުގެ 13:30 އިން ފެށިގެން ވީނުވީއެއް ނޭނގި ގެއްލިގެން، އާއިލާގެ ފަރާތުން ފުލުހުންނަށް ރިޕޯޓް ކޮށްފައިވަނީ ހަމަ އެދުވަހުގެ ރޭ 22:45 ގައެވެ.
ޝިރުމީނާ އަމިއްލައަށް ގެއަށް އައިސްފައިވާ ކަމަށް ފުލުހުންނަށް ރިޕޯޓު ކޮށްފައިވަނީ މިއަދު ހެނދުނު 8:45 ގައެވެ.
އޮންލައިން ނޫސް "ވަގުތު" އަށް މައުލޫމާތު ދެމުން ޝިރުމީނާގެ އާއިލާ މީހަކު ބުނެފައިވަނީ ޝިރުމީނާ ރަހީނުކޮށް ބަޔަކު ފައިސާތަކެއް އަތުލާފައިވާ ކަމަށެވެ.
ބަޔަކު ޝިރުމީނާ ރަހީނު ކުރީ ކަމަށާއި ގިނަ އަދަދެއްގެ ފައިސާ ނުދީފި ނަމަ، މަރާލާނެ ކަމުގެ އިންޒާރު ވެސް ދިން ކަމަށް އޭނާ އާއިލާއަށް މައުލޫމާތު ދީފައިވެއެވެ. ރަހީން ކުރި މީހުން ޝިރުމީނާ އަށް ވަރަށް ބޮޑަށް އަނިޔާ ވެސް ކުރި ކަމަށް ބުނެފައި ވެއެވެ.
