ނޮވެންބަރު 3 ގައި ގައުމުގެ ދިފާއުގައި ނިކުތް ހިތްވަރުގަދަ އަބްތޯލުންގެ ނަމޫނާއަށް ތައުރީފު ހައްގު - މާރިޔާ
1988 ވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާގައި ގައުމުގެ ދިފާއުގައި ނިކުތް ހިތްވަރުގަދަ އަބްތޯލުންގެ ނަމޫނާ އަށް ތައުރީފު ހައްގު ކަމަށް ، ކުރިން ދިވެހި ސިފައިންނަށް ފާޑު ވިދާޅުވި ، މިހާރުގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
މިއަދު ފާހަގަ ކުރަމުން ގެންދާ ނަސްރުގެ ދުވަހުގެ ތަހުނިޔާ ފޮނުވުމަށް ފޮނުއްވި ޚިޠާބުގައި މާރިޔާ ވިދާޅުވީ އެދުވަހު އާންމު ރައްޔިތުންގެ ފަރާތުންވެސް ފެނިގެން ދިޔައީ ތައުރީފު ހައްގު މަސައްކަތެއް ކަމަށެވެ. އަދި ސިފައިންގެ ގާބިލްކަން އިތުރުކުރުމަށް، ސިފައިންގެ އެންމެ މަތީ ވެރިޔާގެ ހައިސިއްޔަތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަރަށް ބޮޑުއިސްކަމެއް ދެއްވާ ކަމަށެވެ.
" މިއަދު ދިވެހި ގައުމީ ދިފާއީ ބާރުގެ ގާބިލުކަމާއި ވަސީލަތްތައް މިވަނީ އެތައް ގުނައެއް ފުޅާވެފައި، ހަމައެއާއެކު ރައްޔިތުންގެ ހިތްތަކުގައި ސިފައިންނާމެދު އޮންނަ އިތުބާރާއި ލޯތްބާއި މަގުބޫލުކަން ވެސް ވަނީ އިތުުރުވެފައި،" މިނިސްޓަރު މާރިޔާ ވިދާޅުވި އެވެ.
މިއަދަކީ ދިވެހިރާއްޖޭގެ 32 ވަނަ ނަޞްރުގެ ދުވަހެވެ. 1988 ވަނަ އަހަރު ނޮވެމްބަރުމަހުގެ 3 ވަނަ ދުވަހު ރާއްޖެއަށް ކުރިމަތިވި ޢުދުވާނީ ޙަމަލާގައި ލިބުނު ނަޞްރު ފާހަގަ ކުރާ ދުވަހެވެ.
