ވަރުންގެ ދަތް ވިއްކާލައިގެން ހަރްޝް ބޭނުންވަނީ ފިލްމަކަށް ފަންޑުކޮށް، ބޫޓެއް ގަންނަން!
ބޮލީވުޑްގެ މަޝްހޫރު އެކްޓަރ ވަރުން ދަވަން ގެ "ވިޒްޑަމް" ދަތް ނަގައިފިއެވެ.
ޑެންޓިސްޓަށް ކުރި ޒިޔާރަތަކަށްފަހު ވަރުން ދަތް ނެގިކަން އިއުލާނުކޮށް، ކޮށްފައިވާ ޕޯސްޓަށް އެތައް ބަޔަކު ވަނީ ހީ، ސަމާސާއަށް އެކި ބަސްތައް ބުނެފައެވެ.
ދަތް ނެގިކަން ހާމަ ކުރަމުން ވަރުން ކޮށްފައިވާ ވީޑިއޯގައި ބުނެފައި ވަނީ އޭނަގެ ތުންފަތް ވެސް ދުޅަވެފައިވާ ކަމަށެވެ. އަދި ޑެންޓިސްޓަށް ކުރި އެދަތުރަކީ އޭނަގެ ޙަޔާތުގައި މިހާތަނަށް ތަޖުރިބާކުރި އެންމެ ހިތްހަމަޖެހޭ ޒިޔާރަތްކަމަށް ނުބުނެވޭނެ ކަމަށް ވެސް ބުނެފައި ވެއެވެ.
ވަރުންގެ އެޕޯސްޓަށްފަހު ފިލްމު އިންޑަސްޓްރީގެ ގިނަ މީހުން އޭނާއާ ދިމާކުރާކަށް މާގިނަ ވަގުތެއް ނުނަގައެވެ. އެގޮތުން އެންމެ މަޖާ އެއްޗެއް ބުނެފައި ވަނީ އަނީލް ކަޕޫރްގެ ފިިރިހެން ދަރި އަދި އެކްޓަރ ހަރްޝް ވަރްދަން ކަޕޫރެވެ.
ވަރުން ކައިރީ ހަރްޝް ބުނީ ދާ މަގުމަތީގައި އޭނާއަށް އެ ދަތް ދީފައި ދިޔުމަށެވެ. އަދި އޭނާ އެދަތް ވިއްކާލާފައި ކުރު ފިލްމަކަށް ފަންޑު ކުރާށާއި އާ ބޫޓެއް ވެސް ގަންނަން ބޭނުންވާ ކަމަށެވެ.
ވަރުން ދަވަންގެ ފިލްމެއްގެ ޝޫޓިންގ ދެން އެންމެ އަވަހަށް ފަށާނީ މިމަހުގެ މެދުތެރޭގައި ކަމަށާއި އެފިލްމުގައި އޭނާއާއެކު ހަރަކާތްތެރި ވާނީ ކިއަރާ އަދްވާނީ އާއި އަނީލް ކަޕޫރް އަދި ނީތޫ ސިންގް ކަމަށް ރިޕޯޓުތަކުން ބުނެފައިވެއެވެ.
