މޭގައި އިންފެކްޝަން އުފެދި ފަރުވާ ހޯދަމުންދިޔަ އެކްޓަރ ފަރާޒް ޚާން މަރުވެއްޖެ
މޭގައި އިންފެކްޝަން އުފެދުމުގެ ސަބަބުން މަހެއްހާ ދުވަހު ހޮސްޕިޓަލުގައި އެޑްމިޓު ކޮށްފައި އޮތް ބޮލީވުޑް އެކްޓަރ ފަރާޒް ޚާން މަރުވެއްޖެއެވެ.
އިންފެކްޝަން އުފެދުމުގެ ސަބަބުން ފަރާޒް ހޮސްޕިޓަލުގައި އެޑްމިޓުކުރީ މިދިޔަ އޮކްޓޯބަރު މަހުގެ 8 ވަނަ ދުވަހުގައެވެ. އޭނާގެ ބަލި ހާލު ދެރަވެ، ބޭސް ފަރުވާ ކުރަން މާލީ ހާލަތު ވެސް ދަށްވެފައިވާކަން އޭނަގެ ބޭބެ ފަހްމާން ޚާން އިއުލާނު ކުރުމުން، ސަލްމާން ޚާން ވަނީ ފަރާޒް ގެ ބޭސް ފަރުވާގެ ހުރިހާ ޚަރަދެއް ކުރުމާ ހަވާލުވެފައެވެ.
ފަރާޒް މަރުވިއިރު އުމުރަކީ 46 އަހަރެވެ. އޭނާއަކީ 90 ގެ އަހަރުތަކުގައި ބެލުންތެރިންގެ ހޫނު ތަރުހީބެއް ލިބުނު "މެހެންދީ" އާއި "ފަރޭބް" އަދި "ޕްރިތުވީ" ފަދަ ފިލްމުތަކުގައި ލީޑް ރޯލު ކުޅުނު އެކްޓަރެވެ.
އެކްޓު ކުރުމުގެ އިތުރުން އޭނާއަކީ ލަވަ ވެސް ކިޔާ އުޅުނު ފަންނާނެކެވެ.
ފަރާޒް ޚާން މިދުނިޔެއިން ވަކިވުމުން ބޮލީވުޑްގެ ގިނަ ފަންނާނުން ވަނީ އޭނާގެ އާއިލާއަށް ތަޢުޒިޔާ ކިޔާފައެވެ.
އެގޮތުން އެންމެ ފުން އަސަރެއް ކުރި ކަމަށް ފާހަގަ ވެފައިވަނީ ކުރީގެ މަޝްހޫރު އެކްޓްރެސް އަދި މިހާރު ކުޅަދާނަ ޕްރޮޑިއުސަރ ޕޫޖާ ބަޓް އެވެ. ޕޫޖާ ވަނީ ފަރާޒް މަރުވުމާ ގުޅިގެން ދެ ޓްވީޓެއްކޮށް، އެންމެންވެސް ފަރާޒް މަތިން ހަނދާން ކުރުމަށް ވެސް އެދިފައެވެ.
