އިންތިހާބުގެ ނަތީޖާ އަދި އިއުލާނެއް ނުކުރޭ! ނަމަވެސް ރައީސް ނަޝީދު ބައިޑަންއަށް މަރުޙަބާ ވިދާޅުވެއްޖެ
އެމެރިކާގެ ރިޔާސީ އިންތިހާބުގެ ވޯޓު ގުނުން އަދިވެސް ކުރިއަށް ދާއިރު، ރާއްޖޭގެ ރައްޔިތުންގެ މަޖިލިހުގެ ރައީސް މުޙައްމަދު ނަޝީދު، އެޤައުމުގެ ރިޔާސީ ކެންޑިޑޭޓު ޖޯ ބައިޑަން އަށް މަރުހަބާ ވިދާޅުވެއްޖެއެވެ.
ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވެފައިވަނީ "އިންތިހާބީ ރައީސް" ޖޯ ބައިޑަން އަށާއި އިންތިހާބީ ނައިބު ރައީސް ކަމާލާ ހެރިސް އަށް މަރުޙަބާ ދަންނަވާ ކަމަށެވެ. އަދި ޕެރިސް އެގްރިމެންޓުގައި އަލުން އެމެރިކާއިން ބައިވެރިވެ، އަޕްޑޭޓު ކޮށްފައިވާ އެންޑީސީ ހުށަހަޅާނެ ދުވަހަކަށް އިންތިޒާރު ކުރައްވާ ކަމަަށެވެ.
ރައީސް ނަޝީދު ބައިޑަން އަށް މަރުޙަބާ ވިދާޅުވެފައިވާއިރު އެމެރިކާގެ ހަ ސްޓޭޓެއްގެ ވޯޓުގެ ސައްހަ ނަތީޖާ އަދިވެސް ސާފު ނުވެއެވެ. އެ ސްޓޭޓުތަކުގެ ތެރެއިން ބައެއް ސްޓޭޓުތަކުން ބައިޑަން ކުރި ހޯދާފައިވާއިރު އަނެއްބައި ސްޓޭޓުތަކުން ކުރީގައި އުޅެނީ ޓްރަމްޕްއެވެ.
ނަމަވެސް މިހާތަނަށް ލިބިފައިވާ ނަތީޖާތަކަށް ބަލާއިރު ކުރީގައި އުޅުއްވަނީ ބައިޑަން އެވެ. ޓްރަމްޕް އަށް ކުރި ލިބޭނެ ކަމަށް ޤަބޫލުކުރި ޕެންސިލްވޭނިއާ އާއި ޖޯޖިއާއިން ވެސް ކުރިހޯދާފައި ވަނީ ބައިޑެންއެވެ. އެކަމާ ގުޅިގެން ޓްރަމްޕް ވަނީ އިންތިހާބުގެ ނަތީޖާ ޤަބޫލު ނުކުރާނެ ކަމަށް ވެސް ބުނެފައެވެ.
