11 ދުވަސް ތެރޭގައި 10،000 އަށްވުރެ ގިނަ ފަތުރުވެރިން ރާއްޖެއަށް
މިމަހުގެ އެކަކުން ފެށިގެން އިއްޔެގެ ނިޔަލަށް އެކަނި ވެސް 10،000 އަށް ވުރެ ގިނަ ފަތުރުވެރިން ރާއްޖެއަށް އައިސްފި ކަމަށް، ޓޫރިޒަމް މިނިސްޓްރީން މިއަދު އާއްމުކުރި ތަފާސް ހިސާބުތަކުން ދައްކައިފިއެވެ.
މި ތަފާސް ހިސާބުން ދައްކާ ގޮތުގައި، އެވަރެޖުކޮށް ދުވާލެއްގެ މައްޗަށް 997 ފަތުރުވެރިން ރާއްޖެއަށް ޒިޔާރަތް ކޮށްފައިވާއިރު، މިދިޔަ މަހު ރާއްޖެއަށް އެވަރެޖުކޮށް ދުވާލެއްގެ މައްޗަށް އައިސްފައި ވަނީ 694 ފަތުރުވެރިންނެވެ.
އަދި މިއަހަރުގެ ޖުލައި މަހުން ފެށިގެން އިއްޔެގެ ނިޔަލަށް ރާއްޖެއަށް ޖުމުލަ 51،354 ފަތުރުވެރިން އައިސްފައިވާއިރު، އެންމެ ގިނައިން ރާއްޖެއަށް ފަތުރުވެރިން ޒިޔާރަތް ކޮށްފައިވަނީ ރަޝިޔާއިންނެވެ. އެގައުމުން އެކަނި ވެސް 11،240 ފަތުރުވެރިން މިހާތަނަށް ރާއްޖެއަށް ވަނީ ޒިޔާރަތް ކޮށްފައެވެ.
ދެވަނައަށް އެންމެ ގިނަ ޓޫރިސްޓުން އައި ގައުމަކަށް އިނގިރޭސިވިލާތް ވާއިރު، އެ ގައުމުން ޖުމުލަ 4،468 ޓޫރިސްޓުން ވަނީ އައިސްފައެވެ. ތިންވަނައަށް އެންމެ ގިނަ ޓޫރިސްޓުން އައީ އެމެރިކާއިންނެވެ. އެ ގައުމުން 3،927 ޓޫރިސްޓުން އައިސްފައި ވެއެވެ.
