އަމިއްލަ އިންޝުއަރެންސް ނަގާފައިވާ ފަރާތްތަކަށް އާސަންދަ ކަނޑާލަނީ
އަމިއްލަ އިންޝުއަރެންސް ސްކީމުތަކުގައި ބައިވެރިވެ، އިންޝުއަރެންސް ހަމަޖައްސާފައިވާ ފަރާތްތަކަށް އާސަންދައިގެ ޚިދުމަތް ނުލިބޭ ގޮތަށް ހަމަޖެއްސުމަށް ސަރުކާރުން ނިންމައިފިއެވެ.
މިގޮތަށް ސަރުކާރުން ނިންމާފައިވަނީ 2021 ވަނަ އަހަރަށް ސަރުކާރުން ލަފާކުރާ ބަޖެޓުގައެވެ. މި ބަޖެޓުގައި ބުނާ ގޮތުން އަމިއްލަ އިންޝުއަރޭންސް ސްކީމުތައް ހަމަޖައްސާފައިވާ ރައްޔިތުންނަށް އާސަންދަ ކަނޑައިލުން ހިމަނާފައިވެއެވެ. މިއީ އާސަންދައަށް ކުރާ ޚަރަދު ކުޑަކުރުމުގެ ގޮތުން ސަރުކާރުން އެޅުމަށް ނިންމާފައިވާ ފިޔަވަޅެކެވެ.
މީގެ އިތުރުން ވަކި މުއްދަތެއްގެ ތެރޭގައި ޑުޕްލިކޭޓުކޮށް ބޭސް ނުނެގޭ ގޮތް ހަމަޖެއްސުމަށް ވެސް ބަޖެޓުގައި ހުށަހަޅާފައިވެއެވެ. އަދި މޯބައިލް އެޕްލިކޭޝަނެއް މެދުވެރިކޮށް ކޮންމެ ރައްޔިތަކަށް ވެސް އާސަންދަ ބޭނުންކުރަމުންދާ މިންވަރު ބެލޭނެ ގޮތް ހަމަޖެެއްސުމަށް ވެސް ބަޖެޓުގައި ހިމަނާފައިވެއެވެ.
މީގެ އިތުރުން ބަޖެޓްގައި ހިިމަނާފައި ވަނީ ޖެނެރަލް ޕްރެކްޓިޝަނާސް ސިސްޓަމެއް ތައާރަފުކޮށް އާދައިގެ އަދި އާންމު ބަލިތަކަށް ޖެނެރަލް ޕްރެކްޓިޝަނަރުންނަށް ދައްކާނެ އިންތިޒާމު ހަމަޖައްސައި ދިނުމެވެ.
ސިއްހީ އިންޝުއަރެންސްގެ ގައުމީ ނިޒާމުގެ ދަށުން ފޯރުކޮށްދެވޭ ހުސްނުވާ އާސަންދަ ސްކީމަކީ ރައްޔިތުންނަށް ސިއްހީ ޚިދުމަތް ލިބިދިނުން ފަސޭހަކޮށް ކޮންމެ ދިވެހި ރައްޔިތެއްގެ ސިއްހީ ޚިދުމަތުގެ ޚަރަދު ހަމަޖައްސައި ދޭ ގައުމީ ނިޒާމެކެވެ.
Ads by STO
