އިސްލާމްދީނާ ދުރުވެވޭތީ ފިލްމު ކުޅުން ހުއްޓާލި ޒައިރާ އެދެނީ މީސް މީޑިއާގައި އޭނާގެ ފޮޓޯތައް ހިއްސާނުކުރުމަށް
ފިލްމީ ދާއިރާގައި މަސައްކަތް ކުރާތީ އިސްލާމްދީނާއި އޭނާގެ އީމާންތެރިކަމަށް ހުރަސް އެޅޭތީ، ފިލްމު ކުޅުން ހުއްޓާލި ފިލްމު "ޑަންގަލް"ގެ ތަރި ޒައިރާ ވަސީމް، އޭނާގެ ފޮޓޯތައް މީސް މީޑިއާގައި ހިއްސާ ނުކުރުމަށް އަނެއްކާވެސް އެދިއްޖެއެވެ.
މިދިޔަ އަހަރު ފިލްމު ކުޅުން ހުއްޓާލި ޒައިރާ މީސް މީޑިއާގައި ކުރި ޕޯސްޓެއްގައި ބުނީ އިންޓަނެޓުން އޭނާގެ ފޮޓޯތައް ފުހެލުމަކީ އޭނާއަށް ވާނެ ކަމެއް ނޫން ކަމަށެވެ.
ނަމަވެސް ފޭން ޕޭޖު ތަކުންނާއި އެހެނިހެން ޕޭޖުތަކުން އޭނާގެ ފޮޓޯތައް ޑިލިޓު ކުރުމަށާއި އިތުރަށް ދެން އޭނާގެ ފޮޓޯތައް ނުލުމަށް އޭނާ ވަނީ އެދިފައެވެ.
ފިލްމު ކުޅުން ހުއްޓާލުމަށް ފަހު ޒައިރާ ވަނީ ބުރުގާ ވެސް އަޅައިފައެވެ. ނަމަވެސް އޭނާގެ އެއްވެސް ފޮޓޯއެއް ހިއްސާ ކޮށްފައެއް ނުވެއެވެ.
ފިލްމު ކުޅުން ހުއްޓާލިކަން ހާމަކުރަމުން މީގެ ކުރިން ޕްރިޔަންކާ ޗޯޕްރާ އާއެކު "ދަ ސްކައި އިސް ޕިންކް" އާއި "ސީކްރެޓް ސްޕަސްޓާ" ފަދަ ފިލްމްތަކުގައި މަސައްކަތް ކޮށްފައިވާ ޒައިރާ ވަސީމް، އޭނާގެ ސޯޝަލް މީޑިއާގައި ބުނީ ފިލްމީ ދާއިރާއަށް ވަނުމަށް އޭނާ މީގެ ފަސް އަހަރު ކުރިން ނިންމި ނިންމުމަކީ އޭނާގެ މުޅި ދިރިއުޅުން ބަދަލުކޮށްލި ނިންމުމެއް ކަމަށާއި ބޮލީވުޑަށް އެޅި ފުރަތަމަ ފިޔަވަޅުން ވެސް ބޮޑު މަޝްހޫރު ކަމަކަށް ދޮރު ހުޅުވިގެން ގޮސް، މުޖުތަމައުގެ ސަމާލުކަން އޭނާއަށް ލިބެން ފެށި ކަމަށާއި އަދި އޭނާއަކީ ކާމިޔާބީ އާއި ޒުވާނުންގެ ރޯލް މޮޑެލް އެއް ކަމަށް ބަަލައިގަންނަން ފެށި ކަމަށެވެ.
ނަމަވެސް އެހެން މީހަކަށް އޭނާ ބަދަލުވާން ވަރަށް އުދަނގުލުން އުޅޭކަމުގެ އިހުސާސެއް ކުރެވުމާއެކު، އީމާންތެރިކަމާ ދުރުވި ކަމަށާއި އީމާންތެރިކަމަށް ހުރަސް އެޅޭ މާހައުލެއްގައި އަބަދު މަސައްކަތް ކުރަން ޖެހުމުން އޭނާ އަށް ދީނާ ދެމެދު އޮތް ގުޅުމަށް ނުރައްކާވި ކަމަށް ކަޝްމީރަށް އުފަން ޒައިރާ ބުނެފައިވެއެވެ.
އަދި އޭނާއަށް ފުދުންތެރިކަމާއި ސުލްހަ ގެނެސްދިނީ މާތްﷲ ބާއްވަައިލެއްވި އެންމެ މަތިވެރި ކީރިތި ޤުރުއާނުން ކަމަށާއި ހެއްދެވި ފަރާތުގެ އިލްމު ލިބޭ ކޮންމެ ހިތަކަށް ސަލާމަތްތެރިކަން ވެރިވެގަންނާނެ ކަމަށާއި އެގޮތުން އޭނާގެ އަމިއްލަ ގަބޫލުކުރުންތަކުގެ ބަދަލުގައި އޭނާއަށް ހިދާޔަތް ދެއްވުން އެދި މާތް ﷲގެ ރަހްމަތްވަންތަ ކަމަށް އޭނާ އެދިއެދި ހުރި ކަމަށް ވެސް ފިލްމު ކުޅުން ހުއްޓާލަމުން ޒައިރާ ވަނީ ބުނެފައެވެ.
ނުލާށޭ ބުނީމަ ދޯ ލާފަ އެ އިނީ️️️️
ޙީނީ
ޒާއިރާ ވަރެއް ނެތް