ބަޖެޓްގެ ކޮމިޓީ ރިޕޯޓަށް ބަހުސްކުރުން އާދިއްތަ ދުވަހު
އަންނަ އަހަރަށް ލަފާކުރާ ދައުލަތުގެ ބަޖެޓް ދިރާސާކުރި ކޮމިޓީގެ ރިޕޯޓަށް ބަހުސްކުރުން އަންނަ އާދިއްތަ ދުވަހު އޮންނަ ޖަލްސާގައި އޮންނާނެކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު ވިދާޅުވީ ބަޖެޓް ދިރާސާކުރާ ކޮމިޓީގެ ރިޕޯޓް ހޯމަ ދުވަހުގެ ރޭގެ ވަގުތެއްގައި މަޖިލީހުގެ އިދާރާއަށް ލިބިފައިވުމާއެކު މިމަހުގެ 29 ވަނަ ދުވަހު ބަޖެޓް ކޮމިޓީގެ ރިޕޯޓަށް ބަހުސް ފެށުމަށް އެޖެންޑާ ކުރައްވާނެ ކަމަށެވެ.
ބަޖެޓް ބަހުސްއައް ފަހު ބަޖެޓް ދިރާސާކުރި ކޮމިޓީން ބަޖެޓަށް ބޮޑެތި ބަދަލުތަކެއް ގެނެސްފައެވެ. މި ބަދަލުތަކާ އެކު ބަޖެޓްގެ ޖުމްލަ އަދަދު ވަނީ 34.92 ބިލިއަން ރުފިޔާއަށް އަރާފައެވެ.
އަންނަ އަހަރަށް ދައުލަތުން ލަފާ ކުރާ ބަޖެޓްގެ ގޮތުގައި މަޖިލީހަށް ހުށަހަޅާފައިވަނީ 34.8 ބިލިއަން ރުފިޔާގެ ބަޖެޓެކެވެ. ބަޖެޓަށް ބަހުސްކޮށް ނިންމާލާފައި ވަނީ މިދިޔަ ބުދަ ދުވަހު އެވެ.
ކޮންމެ މެމްބަރަކަށް ވެސް ބަޖެޓަށް ބަހުސްކުރުމަށް 15 މިނެޓްގެ އެއް ފުރުސަތެއް ލިބިގެން ދިޔައެވެ. އަދި ބަހުސްގެ މަރުހަލާގައި މެމްބަރުން ފާހަގަ ކުރައްވާ ކަންތައްތަކަށް ޖަވާބު ދެއްވުމަށް ފިނޭންސް މިނިސްޓަރ އިބްރާހީމް އަމީރަށް 40 މިނެޓްގެ ވަގުތެއް ވެސް ލިބިގެން ދިޔައެވެ.
