އިންޑިޔާ އެހީގައި ހަތަރު ދާއިރާއަކުން ދިވެހިން ތަމްރީނުކުރުމުގެ މަސައްކަތް ކުރަނީ
އިންޑިޔާ އެހީގައި ހަތަރު ދާއިރާއަކުން ދިވެހިން ތަމްރީނު ކުރުމުގެ މަސައްކަތް ކުރަން ފަށައިފިއެވެ.
ތަމްރީން ކުރުމަށް ހަމަޖެހިފައިވާ ދާއިރާތަކުގެ ތެރޭގައި ކަސްޓަމްސްއާއި އިލެކްޝަންސްއާ ސިވިލް ސާވިސް ކޮމިޝަނާއި، ޓީޗަރުން ހިމެނެއެވެ.
މި މަހުގެ 23 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށް އިންޑިޔާގެ އިންސްޓިޓިއުޓް އޮފް ޑިމޮކްރަސީ އެންޑް އިލެކްޝަން މެނޭޖްމެންޓުގެ ފަރާތުން ރާއްޖޭގެ އިލެކްޝަންސް ކޮމިޝަނުގެ 10 އޮފިޝަލަކަު ތަމްރީން ކުރުމަށް ވަނީ ހަމަޖެހިފައެވެ.
އަދި ޓީޗަރުން ތަމްރީނު ކުރުމުގެ ޚާއްޞަ ޕްރޮގުރާމް މި މަހުގެ 16 ވަނަ ދުވަހު ފެށުމަށް ހަމަޖެހިފައިވާއިރު މި ކޯސްތައް ހިންގަނީ ނެޝަނަލް އިންސްޓިޓިއުޓް ފޯ ޓީޗާޒް ޓްރެއިނިން އެންޑް ރިސާޗް (އެންއައިޓީޓީއާރް) އިންނެވެ.
މީގެ އިތުރުން ކަސްޓަމްސް ދާއިރާގެ މުވައްޒަފުންނަށް ތަމްރީނު ފޯރުކޮށްދޭން ހަމަޖެހިފައިވަނީ މި މަހުގެ 23 ވަނަ ދުވަހުން ފެށިގެން 27 ވަނަ ދުވަހާ ހަމައަށެވެ. ދިވެހިރާއްޖޭގެ ކަސްޓަމް ޚިދުމަތުގެ 24 އޮފިޝަލަކަށް މި ތަމްރީން ދެވޭނެ ކަމަށް ދިވެހިރާއްޖޭގައި ހުންނަ އިންޑިޔާ ހައިކޮމިޝަނުން ބުނެފައިވެއެވެ.
މި ޕްރޮގްރާމްތަކަކީ 2019 ވަނަ އަހަރުގެ ޖޫން މަހުގައި އިންޑިޔާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ޒިޔާރަތުގައި ކަސްޓަމް ދާއިރާއިން އެއްބާރުލުމާ ގުޅޭ ގޮތުން ސޮއިކުރެއްވި އެއްބަސްވުމުގައި ހިމެނޭ ޤާބިލުކަން އިތުރުކުރުމުގެ ދާއިރާގައި ހިމެނޭ ޕްރޮގުރާމެކެވެ.
Ads by STO
