އަންހެނުންނަށް ލިބޭ އަނިޔާތަކަށް އިންސާފު ހޯދައިދިނުމުގައި ސަރުކާރުގެ ހަމަހަމަކަމެއް ނެތް: އިދިކޮޅު
އަންހެނުންނަށް ލިބޭ އެކި އަނިޔާތަކަށް އިންސާފު ހޯދައިދިނުމަށް މި ސަރުކާރު ނުކުޅެދިފައިވާ ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ބުނެފިއެވެ.
އަންހެނުންނަށްކުރާ އަނިޔާތަކާ ދެކޮޅަށް ބައިނަލްއަޤްވާމީ ގޮތުން ފާހަގަކުރާ ދުވަހުގެ މުނާސަބަތުގައި އިދިކޮޅުން ނެރުނު ބަޔާނުގައި ޤައުމު ބިނާ ކުރުމާއި ޤައުމީ އުފެއްދުންތެރިކަމުގައި އަންހެނުންގެ ޙިއްސާ ބޮޑުކަން ފާހަގަކޮށް، އަންހެނުންނަށް އެކި ގޮތްގޮތުން ލިބެމުންދާ އަނިޔާތަކަށް އިންސާފު ނުލިބި ނުފޫޒާއި ބާރުގެ ބޭނުންކޮށްގެން އެފަދަ މައްސަލަތައް މަޑުޖެހިފައިވާތީ ވަނީ ކަންބޮޑުވުން ފާޅުކޮށްފައެވެ.
އަދި ހާއްސަކޮށް ޖިންސީ ފުރައްސާރައިގެ ޝިކާރައަކަށްވާ އަންހެނުންނަށް އިންސާފު ހޯދައިދިނުމުގައި މިސަރުކާރުގެ ހަމަހަމަކަމެއް ނެތް ކަމަށް އެ ބަޔާނުގައި ވަނީ ބުނެފައެވެ. އަދި އެ ފަރާތްތަކަށް އިންސާފު ހޯދައިދެވިފައި ނުވާތީ ކޯލިޝަނުން ވަނީ އެކަން ކުށްވެރިކޮށްފައެވެ.
"އަދި ސަރުކާރުގެ އެންމެ މަތީ ފަންތީގައި ޖިންސީ ފުރައްސާރައާއި ޖިންސީ ގޯނާ ކުރިކަމުގެ ތުހުމަތު ކުރެވޭ ފަރާތްތައް ވަރަށް މިނިވަންކަމާއެކު މުޖްތަމައުގައި ހަރަކާތްތެރި ވަމުން ދިއުމާއި، ގާނޫނު ނަގަހައްޓާ ތަންފީޒު ކުރުމުގެ ޒިންމާ މަތިކޮށްފައިވާ ވަޒީރުން އަންހެނުންގެ ހައްގަށް އުނިކަން ލިބޭ އަދި އިންސާފު ގާއިމުކުރުމަށް ނުފޫޒު ފޯރުވާފަދަ މޭރުމުން ވާހަކަ ދައްކަމުން ދާކަމީ މިއަދުގެ ސަރުކާރުން އަންހެނުންނަށް އިހްތިރާމް ނުކުރާ ކަމާއި، އަންހެނުންނަށް ލިބޭ އެކިއެކި އަނިޔާތަކަށް އިންސާފު ހޯދައިދިނުމުގައި ފެއިލް ވެފައިވާކަން ހާމަވާ ކަމެކެވެ." އިދިކޮޅުގެ ބަޔާނުގައި ބުނެފައިވެއެވެ.
މި ސަރުކާރުގެ ދޯހަޅި އަދި ހަމަހަމަ ކަމެއްނެތް ސިޔާސަތުތަކުގެ ސަބަބުން އަންހެނުންނަށް ލިބެމުންދާ އަނިޔާތަކަށް އިންސާފު ނުލިބި، އެކަނބަލުންގެ ޙައްޤުތައް ކަށަވަރު ނުކުރެވުމުގެ ބިރުވެރިކަން އިންތިހާއަށް އޮތުމަކީ ބިރުވެރި މެސެޖެއްގެ ގޮތުގައި އިދިކޮޅުގެ ބަޔާނުގައި ވަނީ ފާހަގަކޮށްފައެވެ.
Ads by STO
