10 ދުވަސްތެރޭ ކޮވިޑް-19 ވެކްސިން އިނގިރޭސި ވިލާތުގައި ވެކްސިން ޖަހަން ފަށާނެ
އެމެރިކާގެ ކުންފުނި ކަމަށްވާ ފައިޒާއާއި ޖަރުމަނުގެ ކުންފުންޏެއް ކަމަށްވާ ބައޯޓެކް އިން އުފައްދާފައިވާ ވެކްސިން ކުރިއަށް އޮތް ، 10 ދުވަސް ތެރޭގައި އިނގެރޭސި ވިލާތުގައި، ޖަަހަން ފަށާނެ ކަމަށް ނޫސްތަކުން ރިޕޯޓްކޮށްފިއެވެ.
"ދަ ގާޑިއަން" އިން ރިޕޯޓްކޮށްފައިވަނީ ޑިސެންބަރ 7 ވަނަ ދުވަހު އިނގިރޭސިވިލާތުގައި ފައިޒާގެ ވެކްސިން ބޭނުން ކުރަން ފަށާނެ ކަމަށާއި އެންމެ ފުރަތަމަ ވެކްސިންގެ ޑޯޒެއް ޖަހާނީ ސިއްޙީ ދާއިރާގައި މަސައްކަތް ކުރާ މުވައްޒިފުންނަށް ކަމަށެވެ.
އެނޫހުން އެޤައުމުގެ ހޮސްޕިޓަލްތަކާ ހަވާލާދީ ބުނެފައި ވަނީ، މިވެކްސިން ހޮސްޕިޓަލްތަކުގައި ފުރަތަމަ ޖަހަން ނިންމާފައި ވަނީ، މި ވެކްސިން އެއްތަނުން އަނެއްތަނަށް އުފުލުމުގައި ދިމާވާ ދަތިތަކުގެ ސަބަބުން ކަމަށެވެ.
މިގޮތުން ބަލާއިރު، ފައިޒާ ވެކްސިން އެންމެ މަތިވެގެން -70 ޑިގްރީ ސެލްސިއަސްގައި ބަހައްޓަން ޖެހެއެވެ. އާއްމުކޮށް ވެކްސިން އުފައްދަނީ، ވައިރަސް ނުވަތަ ބެކްޓީރިއާގެ މަރުވެފައި ނުވަތަ ބާރު ދެރަ ބަޔަކުން ކަމުގައި ވީނަމަވެސް، ފައިޒާގެ ވެކްސިން ހަދާފައި ވަނީ، ލެބޯޓަރީގައި އުފައްދާފައިވާ އެމްއާރއެންއޭ އެއް ބޭނުން ކޮށްގެންނެވެ. މިހެންވުމުގެ ސަބަބުން މި ވެކްސިން އެއްތަނުން އަނެއްތަނަށް އުފުލަން ދަތިތަކާ ކުރިމަތިވެއެވެ. ސަބަބަކީ މި ވެކްސިން ވަކި ވަރަކަށްވުރެ ފިނި ހޫނުމިން މަތިވެއްޖެނަމަ، ވެކްސިންގެ ބާރު ކެނޑޭތީއެވެ. މިގޮތުން ވެކްސިން ބެލްޖިއަމް އިން އުފައްދާއިރު، ވެކްސިން ޖެހުމުގެ ކުރިން ފިނިހޫނުމިން ކުޑަކޮށް ވެސް ބަދަލު ކުރެވޭނީ 4 ފަހަރުއެވެ.
ޑިސެންބަރ 7 ވަނަދުވަހު ވެކްސިން ބޭނުން ކުރާނެ ކަމަށް ނޫސްތަކުން ރިޕޯޓް ކޮށްފައި ވީނަަމަވެސް، މި ވެކްސިން އަދި މިހާތަނަށް އެޕްރޫވް ކޮށްފައެއް ނުވެއެވެ. އިނގިރޭސި ވިލާތުގައި ވެކްސިނެއް ބޭނުން ކުރެވޭނީ، އިނގިރޭސިވިލާތުގެ މެޑިސިން އެންޑް ހެލްތްކެޔަރ ޕްރަޑަކްޓް ރެގިއުލޭޓަރީ އެޖެންސީ، އިން ޚާއްސަ ހުއްދައެއް ދިނުމުންނެވެ. މި ހުއްދައަށް މިހާރު ފައިޒާއިން އެދިފައިވާއިރު، އެކަން ވަނީ އެ އެޖެންސީ އިން ކަށަވަރު ކޮށްދީފައެވެ.
ފައިޒާގެ ވެކްސިންއަކީ 95 އިންސައްތަ ކާމިޔާބު ވެކްސިނެކެވެ. މިވެކްސިންގެ އިތުރުން އޮކްސްފޯޑް އިން އުފައްދާފައިވާ ވެކްސިން ވެސްވަ ނީ އާއްމު ބޭނުމަށް ބޭނުން ކުރުމުގެ ހުއްދައަށް އެދިފައެވެ.
