ތުއްތު ދަރިފުޅު ބަހައްޓާފައި ވިހަން މާލެ އައިސް ، މާލޭގައި ތާށިވި އަންހެނާއަށް ދީލަތި އެހީތަކެއް ، މިހާރު ކަރަންޓީނުގައި
ކޮވިޑް19 އާއި ގުޅިގެން މާލެ ލޮކްޑައުން ކުރުމާއެކު މާލޭގައި ތާށިވި އަންހެނެއްގެ ވާހަކަ ''ދެން'' އިން ވާނީ ގެނެސްދީފައެވެ. (ދެ އަހަރު ނުވާ ތުއްތު ދަރިފުޅު ބަހައްޓާފައި އިމަޖެންސީކޮށް ވިހަން މާލެ ގެނައި އަންހެނަކު އަތްމަތި ދަތިވެ ބިކަވަނީ )
މާބަނޑު މިއަންހެން މީހާ އިމަޖެންސީގައި މާލެ ގެނައިއިރު ދެއަހަރު ހަމަނުވާ ކުއްޖެއް ރަށުގައި ހުއްޓެވެ.
ވިހެއުމުގެ ކަންތައްތައް ނިމުމުން ފުރަބަންދާއެކު މާލޭގައި ތާށިވީއެވެ. އަދި ކުޑަ ދަރިފުޅާއި ފިރިމީހާއާއެކު ކޮޓަރިއެއް ކުއްޔަށް ހިފައިގެން ކޮޓަރީގައި ތިބޭތާ ހަފްތާއެއްހައި ދުވަސްވީރު އަތްމަތި ދަތިވެ ކުލި ނުދެއްކޭ ހިސާބަށް ދިޔައެވެ. އަދި ރަށަށް ދެވޭތޯ އެކަމަށް އެދި ނަންނޯޓް ކޮށް އެޗްޕީއޭއާއި ޖެންޑާ މިނިސްޓްރީއަށް މެއިލްކޮށް އެތަކެއް މަސައްކަތް ކުރިއެވެ.
މި އަންހެންމީހާގެ ވާހަކަ ''ދެން'' އިން ގެނެސްދިނުމުން އެތައްބަޔަކު ވަނީ އޭނާއަށް އެހީތެރިވުމަށް އިސްނަގާފައެވެ. އެތައް ބަޔަކު މި ނޫހުގެ ފޭސްބުކް ޕޭޖަށް މެސެޖުކޮށް އޭނާއާއި ގުޅޭނެ ގޮތް ތަނަވަސްކުރިއެވެ. އަދި ކުލީ ކޮޓަރި ދޫކޮށް މީހެއްގެ ގެއަށް ބަދަލުވުމުގެ ފުރުސަތު ވެސް މީހަކު ދިނެވެ. ހަމައެހެންމެ ފައިސާގެ އެހީތެރިކަން ވެސް އެކި މީސްމީހުން ވެދީފައިވެއެވެ.
ރަށަށް ދާމީހުން 14 ދުވަހުގެ ކަރަންޓީނު ފުރިހަމަ ކުރަންޖެހޭ އުޞޫލުގެ ދަށުން މިއަންހެންމީހާ ފިރިމީހާއާއި ކުޑަ ދަރިފުޅާއެކު މިހާރު ހުރީ ހުޅުމާލޭ ކަރަންޓީނުގައެވެ. އަދި ކަރަންޓީނު ފުރިހަމަ ކުރުމަށްފަހު އިތުރު ކަމެއް ކުރިމަތި ނުވާނަމަ 14 ދުވަސްފަހުން ރަށަށް ދިޔުމުގެ އިންތިޒާމް ހަމަޖެހިގެންދާނެއެވެ.
ކުލީ ކޮޓަރިން ނިކުމެ ކަރަންޓީނަށް ދެވުމުން އުފާވެފައި ހުރި މި އަންހެން މީހާ މިރޭ ވަނީ އޭނާއަށް އެހީތެރިވި އެންމެންނަށް ޝުކުރު އަދާކޮށްފައެވެ.
"ވަރަށް އުފާވެއްޖެ، އެހީވެދިން އެންމެންނަށް ވަރަށް ބޮޑަށް ޝުކުރު އަދާކުރަން" އެހީއަށް ލިބުނު ފައިސާއިން ތުއްތު ދަރިފުޅަށް ބޭނުންވާ ތަކެތި ގަނެވުނުކަން ވެސް ފާހަގަ ކުރަމުން އޭނާ ބުންޏެވެ.
''ދެން''ގެ އެދުމަކީ ރަށުގައި ހުރި ތުއްތު ދަރިފުޅާއި އާއިލާއަށް އިތުރުވި ކުއްޖާއާއި ބައްދަލުވެ އާއިލާއެކީގައި އުފާވެރި ވަގުތުތަކެއް ހޭދަވުމުގެ ފުރުސަތު މިންވަރު ކުރެއްވުމެވެ.
މިއަންހެން މީހާއަށާއި ޙާލުގައި ޖެހިފައިވާ މީހުންނަށް އެހީތެރިވަމުންދާ އެންމެންނަށް ﷲ ބަރަކާތް ލައްވާށިއެވެ. އަދި އެއުރެންގެ ދިރިއުޅުން ފަސޭހަ ކުރައްވާށިއެވެ.
ކީރިތި ރަސޫލާގެ ޙަދީޘް ބަސްފުޅެއްގެ މާނައިގައިވެއެވެ. މީހަކަށް ޖެހިފައިވާ ދަތި އުނދަގުލެއް ފިލުވައިދިން މީހަކަށް ޤީޔާމަތް ދުވަހުގައި ﷲ ތަޢާލާ ދަތިކަމެއް ފިލުއްވާ ދެއްވާ ހުއްޓެވެ. އަދި ބޭނުން ޖެހިފައިވާ މީހަކަށް އެހީތެރިވި މީހަކަށް ދުނިޔެއާއި އާޚިރަތުގައި ﷲ ތަޢާލާ އެހީތެރިވެދެއްވުމުގައި ވޮޑިގެންވެއެވެ.
