މުޅި ދައުލަތުގައި ވައްކަމާއި ޚިޔާނާތް އޮތްއިރު، ބެލޭނެ ގޮތެއް ނެތް: ދިޔާނާ
މުޅި ދައުލަތުގައި ވައްކަމާއި ހިޔާނާތް އޮތްއިރު އެ މައްސަލަތައް ބެލޭނެ ގޮތެއް ނެތް ކަމަށް ވިދާޅުވެ ކުރީގެ ބަންޑާރަ ނައިބު ދިޔާނާ ސައީދު ފާޑު ވިދާޅުވެއްޖެއެވެ.
ދިޔާނާ މިފަދައިން ވިދާޅުވެފައި ވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) ގައި ހިންގައިވާ ކަމަށް ބުނާ އަށް މިލިއަން ރުފިޔާގެ ބޮޑު ޚިޔާނާތަށް އިޝާރާތް ކުރައްވައެވެ.
އެގޮތުން ދިޔާނާ މިއަދު ކުރެއްވި ޓްވީޓެއްގައި ވިދާޅުވީ މުޅި ދައުލަތުގައި އޮތީ ޚިޔާނާތާއި ވައްކަން ކަމަށެވެ.
"އެމްއެމްޕީއާރުސީގެ ވައްކަން. އެމްޕީއެލް އިން ވައްކަން. ޕަބްލިކް ޕްރޮކިއުމަންޓުން ވައްކަން، ވައްކަމުގެ އެއްވެސް މައްސަލައެއް ބެލޭނެ ގޮތެއް ނެތް" ދިޔާނާ ވިދާޅުވެފައިވެއެވެ.
އެމްޕީއެލްއިން އަށް މިލިއަން ރުފިޔާގެ ޚިޔާނާތެއް ހިންގާފައިވާކަން ޓްވިޓާ މެދުވެރިކޮށް ހާމަ ކުރައްވާފައި ވަނީ އެކުންފުނީގެ ޗެއާމަން މުޙައްމަދު ޒަކީ (ނަޒާކީ ޒަކީ) އެވެ. އެމްޕީއެލްގެ ތެރޭގައި ހިންގި ތެލުގެ ވިޔަފާރިއެއް ފެންމަތި ކުރައްވާ ޒަކީ ވިދާޅުވީ އެމްޕީއެލްއިން ތެލުން އަށް މިލިއަން ރުފިޔާގެ ވައްކަމެއް ކޮށްފައިވާ ކަމަށާއި އެކަމުގައި ޝާމިލުވާ މުވައްޒަފުން ސަސްޕެންޑު ކުރަން އުޅުއްވުމުން ބޯޑުން އެއްބާރުލުން ނުލިބުނު ކަމަށެވެ.
ނަމަވެސް އެކުންފުނިން ފަހުން ވަނީ އެމުވައްޒަފުން ސަސްޕެންޑު ކޮށްފައެވެ. އަދި އިއްޔެގެ ވަގުތެއްގައި ޒަކީ ވަނީ އެމްޕީއެލްގެ ޗެއާމަންކަމުގެ މަގާމުން އިސްތިއުފާ ވެސް ދެއްވާފައެވެ.
