މާސްކް ނާޅާ އުޅޭ މީހުން ކޮވިޑް ސެންޓަރުތަކަށް ލަނީ
އިންޑިއާގައި މާސްކް ނާޅާ އުޅޭ މީހުން ކޮވިޑް ސެންޓަރުތަކަށް ލާނެ ކަމަށް ގުޖްރާތު ހައި ކޯޓުން އަމުރު ކޮށްފިއެވެ.
އިންޑިއާގެ ގުޖްރާތުގައި މާސްކް ނާޅާ އުޅޭ މީހުން ގިނަ ވަމުން ދިޔުމާ ގުޅިގެން ގުޖްރާތު ހައި ކޯޓުން ނެރުނު އަމުރުގައި ވަނީ ފޭސް މާސްކް ނާޅާ މީހުންނަށް އަދަބު ދިނުމުގެ ގޮތުން ކޮވިޑް ބަލި މީހުން ތިބޭ ސެންޓަރުތަކުގައި އެމީހުން ލައްވާ ކޮމިއުނިޓީ މަސައްކަތް ކުރުވުމަށެވެ. މި ޕޮލިސީ އެކުލަވާލުމަށް ހައި ކޯޓުން ސްޓޭޓް ސަރުކާރަށް ވެސް ވަނީ އަންގާފަ އެވެ.
މާސްކް ނާޅާ އުޅޭ މީހުންނަށް އަދަބު ދިނުމުގެ ގޮތުން އެ ތަންތަނުގައި އެމީހުން ލައްވާ ސާފުކުރުމާއި، ކެއްކުން، އެކި ކަހަލަ މަސައްކަތުގައި އެހީތެރިވެދިނުން، ރެކޯޑް ބެލެހެއްޓުން ފަދަ ކަންތައްތައް ހިމެނެއެވެ.
އެ އަމުރުގައި ވާ ގޮތުން ކޮމިއުނިޓީ ސާވިސް ފުރިހަމަކުރަން ޖެހޭނީ މާސްކް އެޅުމުގެ ގަވާއިދާ ޚިލާފުވުމުން ދައްކަން ޖެހޭ ޖޫރިމަނާ ވެސް ދެއްކުމާ އެކުގައެވެ.
މި އަދަބު ކަނޑައަޅަނީ ފަސް ދުވަހާއި 15 ދުވަހާ ދެމެދުގެ މުއްދަތަކަށެވެ. ދުވާލަކު ހަތަރެއް ނުވަތަ ފަސް ގަޑިއިރު ކޮވިޑް ބަލި މީހުން ބައިތިއްބާފައި ތިބޭ ސެންޓަރެއްގައި މެޑިކަލް ނޫން މަސައްކަތެއް ކުރުވަން ޖެހެއެވެ.
އަދަބު ދޭން ހަމަޖެހިފައި ވީ ނަމަވެސް ކޮންމެ މީހަކަށް ވެސް ދޭ އަދަބު ކަނޑައަޅާނީ އެމީހެއްގެ އުމުރާއި ތައުލީމީ ފެންވަރު އަދި ޖިންސަށް ބަލާފައި ކަމަށް އެ އަމުރުގައި ފާހަގަ ކޮށްފައި ވެއެވެ.
Ads by STO
