ރާއްޖޭގެ ބޮޑު ބަޔަކަށް ހުދު ސަމާލު ނެރެފި
ރާއްޖޭގެ ބައެއް ހިސާބުތަކަށް މިދުވަސްކޮޅު ވިއްސާރަވެ މޫސުން ގޯސްވުމާ ގުޅިގެން، ބައެއް ސަރަޙައްދަށް ހުދު ސަމާލު ނެރެފިއެވެ.
އެގޮތުން މޫސުމާބެހޭ ޤައުމީ އިދާރާ (މެޓް އޮފީހުން) ހުދު ސަމާލު ނެރެފައި ވަނީ މ. އަތޮޅުން ފެށިގެން އައްޑޫ ސިޓީއާ ދެމެދުގެ ރަށްތަކަށެވެ.
މެޓް އޮފީހުން ހުދު ސަމާލު ނެރެފައި ވަނީ މިއަދު މެންދުރުފަހު 3:00 އިން މިރޭ 8:00 ޖެހުމާ ހަމައަށެވެ.
މޫސުމާބެހޭ އިދާރާއިން ބުނެފައި ވަނީ މިސަރަޙައްދުތަކުގައި ހިމެނޭ ރަށްތަކަށް ގަޑިއަކު 19 މޭލާއި 24 މޭލާ ދެމެދުގެ ބާރު މިނެއްގައި ވައި ޖެހި، ގަޑިއަކު 45 މޭލަށް ވައި ގަދަވާނެ ކަމަށެވެ. އަދި މިސަރަޙައްދުގެ ކަނޑުތައް ވެސް ގަދަވާނެ ކަމަށް މެޓް އޮފީހުން ލަފާ ކޮށްފައިވެއެވެ.
އިއްޔެގެ ހެނދުނު 8:00 އިން މިއަދު ހެނދުނު 8:00 އަށް ވިލާގަނޑުގައި އެންމެ ވައިގަދަވި ބާރުމިން ރިކޯޑު ކުރެވިފައިވާ ރަށްތަކުގެ ރިކޯޑުތަކަށް ބަލާލާއިރު ވައިގެ ބާރުމިން އެންމެ ގަދަވެފައި ވަނީ ފުވައްމުލަކު ސިޓީއަށެވެ.
