"ނަމާދަކީ ވަގުތު ކަނޑައެޅިގެންވާ އަޅުކަމެއް"
ނަމާދަކީ ވަކި ވަގުތެއް ކަނޑައެޅިގެންވާ އަޅުކަމެއް ކަމުގައި ދީނީ އިލްމުވެރިޔާ ޑރ. މުހައްމަދު އިޔާޒް އަބްދުލް ލަތީފް ވިދާޅުވެއްޖެއެވެ.
ޑރ. އިޔާޒް މިރޭ މިހެން ވިދާޅުވެފައި މިވަނީ، ނަމާދަށް ދާން ޖެހޭނީ އެވަގުތު ކުރަން އިން މަސައްކަތެއް އަވަހަށް ކޮށް ނިންމުމަށްފަހުގައި ކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިރޭ ވިދާޅުވެފައި ވަނިކޮށެވެ.
މަޖިލީހުގައި ކުރިއަށްދިޔަ ޖަލްސާ މެދުކަނޑާލުމުގެ ކުރިން މެންބަރުންނާ ވާހަކަ ދައްކަވަމުން ނަޝީދު ވިދާޅުވީ ނަމާދަށް ދާން ޖެހެނީ އެކުރާކަމެއް އަވަހަށްކޮށް ނިންމުމަށް ފަހުގައި ކަމަށެވެ.
"ނަމާދަށް އަރުއްވާ ބޭފުޅުންނަށް އެނގިވަޑައިގަންނަވާނެ މިހާރު ޢިޝާ ނަމާދަށް ގޮވަނީ 07:12 ގައިކަން. މަޣުރިބު ނަމާދަށް ހަމަ ދެންމެއަކު އެގޮވީ. މާވަށު ދާއިރާގެ އިއްޒަތްތެރި މެންބަރަށް ދަންނަވާލަން ބޭނުން ނަމާދުގައި އޮންނަ ގޮތަކީ އެކުރާކަމެއް އަވަހަށްކޮށް ނިންމާފައި ނަމާދަށް ދިއުން. އެގޮތަށް އަޅުގަނޑުމެންނަށް މިކަމުގައި އަބަދުވެސް އެނގިފައި އޮންނަނީ." މާވަށު ދާއިރާގެ މެންބަރު މުހައްމަދު ސައީދަށް ނިސްބަތް ކުރައްވާ ރައީސް ނަޝީދު ވިދާޅުވިއެވެ.
މިކަމާ ގުޅިގެން އިޔާޒް ކުރެއްވި ޓްވީޓުގައި ވިދާޅުވީ ނަމާދަކީ ވަގުތު ކަނޑައެޅިފައިވާ އަޅުކަމެއް ކަމަށެވެ.
އަދި " އެއީ ތިމާ އަމިއްލަ އަށް ބޭނުން ގަޑިއެއްގައި ކުރަން އޮންނަ ކަމެއް ނޫން" ކަމުގައި ވެސް އިޔާޒް ވިދާޅުވިއެވެ.
ރައީސް ނަޝީދު ނަމާދާ ގުޅުވާ ދެއްކެވި ވާހަކަފުޅާ ގުޅިގެން ގިނަ ބަޔަކު އަންނަނީ ފާޑުކިޔަމުންނެވެ.
Ads by STO
