މިއަހަރަށް މަޖިލިސް ނިންމާލާ، މެންބަރުން ޗުއްޓީއަށް
ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ ފަހު ޖަލްސާ ނިންމުމަށްފަހު މަޖިލިސް މިއަދު ޗުއްޓީއަށް ހިނގައްޖެއެވެ.
ތިންވަނަ ދައުރުގެ ފަހު ޖަލްސާ ނިންމަވާލައްވަމުން ނައިބު ރައީސާ އީވާ އަބްދުﷲ ވަނީ ނިމިދިޔަ ދައުރުގެ ކުރު ހުލާސާއެއް އިއްވާފައެވެ.
އެގޮތުން މި ދައުރުގައި ޖަލްސާގެ ވަގުތުގައި ޖުމްލަ 89 ގަޑިއިރު، އަދި ކޮމިޓީގައި 330 ގަޑިއިރު މެންބަރުން މަސައްކަތް ކޮށްފައިވާ ކަމަށް އީވާ ވިދާޅުވިއެވެ.
ނިމިދިޔަ މިދައުރުގެ ތެރޭގައި ޖުމްލަ 15 ބިލެއްގެ މަސައްކަތް ނިންމައި ފާސްކުރެވިފައިވާ ކަން ވެސް މަޖިލިހުގެ ނައިބު ރައީސާ ވަނީ ފާހަގަ ކުރައްވާފައެވެ. އެގޮތުން ތައުލީމުގެ ބިލާއި، ފުލުހުންގެ ހިދުމަތުގެ ބިލާއި، އިންތިގާލީ އިންސާފުގެ ބިލުގެ އިތުރުން ކުޑަކުދިންނަށް މަރުގެ އަދަބު ނުދެވޭ ގޮތަށް މިއަދު ކުޑަކުދިންގެ އަދުލުގެ ގާނޫނަށް ގެނެވެނު އިސްލާހު އީވާ ފާހަގަ ކުރެއްވިއެވެ.
މީގެއިތުރުން ރިޔާސަތުން ހުށަހެޅުނު 8 މައްސަލައަކާ ސަރުކާރުން ހުށަހެޅުނު 8 މައްސަލައެއްގެ އިތުރުން އެހެނިހެން މައްސަލަތަކުގެ ގޮތުގައި އިތުރު 14 މައްސަލައެއް މަޖިލީހުން ނިންމާފައިވާ ކަމަށާއި، މި ދައުރުގައި ސަރުކާރުގެ އެކި ވަޒީރުންނާ ޖުމްލަ 17 ސުވާލެއް ކުރެވިފައިވާ ކަން ވެސް އީވާ ފާހަގަ ކުރެއްވިއެވެ.
