މަޖިލިހުގެ މެންބަރުންގެ މުސާރައަކީ އެކަށީގެންވާ އަދަދެއް: މަޖިލިސް ރައީސް
ރައްޔިތުންގެ މަޖިލިހުގެ މެންބަރުންނަށް ލިބޭ މުސާރައަކީ އެމެންބަރުންނަށް އެކަށީގެންވާ އަދަދެއް ކަމަށް މަޖިލިސް ރައީސް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
މަޖިލިސް ރައީސް އާއި އާއްމުންނަށް ސުވާލު ކުރެވޭ ގޮތަށް ފުރުސަތުދީގެން މިރޭ ކުރިއަށްދާ "އާސްކް ސްޕީކަރ" ބައްދަލުވުމުގައި، މެންބަރުންގެ މުސާރައާ ގުޅޭގޮތުން މީހަކު ކުރި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ ކޮވިޑް-19 އާ ގުޅިގެން އެމަނިކުފާނުގެ މައްސަލައަށް ވަރަށް ބޮޑު ބަދަލެއް އައިސްފައިވާ ކަމަށާއި އެގޮތުން ކޮންމެ މަހަކު އެމަނިކުފާނަށް ލިބިވަޑައިގަންނަވާ މުސާރައިގެ އަދަދު މަދު ކަން ފާހަގަ ކުރެވޭ ކަމަށެވެ.
މަޖިލީހުގެ މެމްބަރުންނަށް މުސާރަ އާއި އިނާޔަތްތަކުގެ ގޮތުގައި މަހަކު 82،000ރ. ލިބިވަޑައިގަންނަވައެވެ. ނަމަވެސް ކޮވިޑް-19 ގެ ބަލިމަޑުކަމާއި ގުޅިގެން އިގުތިސާދަށް ބޮޑެތި ގޮންޖެހުންތަކެއް ކުރިމަތިވިއެވެ. އެހެންކަމުން މަޖިލިހުގެ މެމްބަރުން ހިމެނިވަޑައިގަންނަވާ ގޮތަށް ދައުލަތުގެ އިސް ބޭފުޅުންގެ މުސާރަ އާއި އިނާޔަތްތައް ވެސް ވަނީ ކުޑަކޮށްފައެވެ. މިހާރު ކޮމިޓީ އެލަވަންސާ އެކުގައި ވެސް މެމްބަރަކަށް ލިބިވަޑައިގަންނަވާނީ މަހަކު 69،750.ރ އެވެ.
"މަޖިލިހުގެ މެމްބަރުންގެ މުސާރަ އާއި އިނާޔަތްތައް އެބަ ގުޅޭ އެމީހުން ކުރާ މަސައްކަތްތަކާ" ރައީސް ނަޝީދު ވިދާޅުވިއެވެ.
މީގެއިތުރުން ރައީސް ނަޝީދު ވިދާޅުވީ އެމަނިކުފާނު މަޖިލިހަށް އެންމެ ފުރަތަމަ ވަޑައިގެންނެވީ 1999 ވަނަ އަހަރު ކަމަށާއި އެއިރު މުސާރައަކީ 2،500 ރުފިޔާ ކަމަށެވެ.
