އައިފޯނަށް ޚާއްސަ "އާސަންދަ" މޮބައިލް އެޕްލިކޭޝަން ވެސް ތަޢާރަފް ކޮށްފި
އާސަންދައިގެ ޚިދުމަތް ހޯދާ ފަރާތްތަކަށް "އާސަންދަ" މޮބައިލް އެޕްލިކޭޝަން ތަޢާރަފް ކޮށްފިއެވެ. މިއަދު ތަޢާރަފް ކޮށްފައި ވަނީ އައިފޯނުތަކަށް ޚާއްސަ "އާސަންދަ" މޮބައިލް އެޕްލިކޭޝަން ވަރޝަންއެވެ. އެންޑްރޮއިޑް ވަރޝަން ތަޢާރަފްކޮށްފައި ވަނީ މިދިޔަ ސެޕްޓެމްބަރުމަހުގެ ތެރޭގައެވެ.
މިއެޕްލިކޭޝަންގައި ކޮންމެ ދިވެހި ރައްޔިތަކަށް ވެސް ރެޖސްޓްރީ ކުރެވޭނެ ކަމަށް އާސަންދައިން ބުނެފައިވެއެވެ. އެޕް ޑައުންލޯޑްކޮށް ރެޖިސްޓާވުމުން، އާސަންދަ ސްކީމްގެ ދަށުން ޚިދުމަތް ފޯރުކޮށްދޭ ތަންތަނުގެ ތެރެއިން އާސަންދައިގެ އައު އޮންލައިން ޕޯޓަލް "ވިނަވި" ބޭނުންކުރާ ހުރިހާ ތަނަކުން، އެމީހަކު ހޯދާ ޚިދުމަތްތަކުގެ ތަފްޞީލު އެޕްލިކޭޝަނުން ފެންނަން ހުންނާނެ ކަމަށް ވެސް އެ ކުންފުނިން ބުނެއެވެ.
މީގެއިތުރުން ޑޮކްޓަރުން ލިޔެދެއްވާ އީ-ޕްރިސްކްރިޕްޝަން ނުވަތަ އިލެކްޓްރޯނިކް ބޭސް ސިޓީތައް ވެސް އެޕް މެދުވެރިކޮށް ބަލާލެވޭނެ ކަމަށާއި ނުހޯދާ ޚިދުމަތެއް ލިސްޓްކޮށްފައި ވާނަމަ އެޕް މެދުވެރިކޮށް އެކަން ރިޕޯޓްކުރުމުން އެކަން ތަޙުޤީޤު ކުރާނެ ކަމަށް ވެސް އާސަންދައިން ބުނެފައިވެއެވެ.
"އާސަންދަ" މޮބައިލް އެޕް ތަޢާރަފް ކުރުމުގެ އެންމެ ބޮޑު މަޤްސަދަކީ އާސަންދަ ސްކީމްގެ ކަންކަން ވީހާވެސް ދެފުށް ފެންނަ ގޮތަކަށް ކުރިއަށް ގެންދިއުން ކަމަށް އެކުންފުނިން ބުނެފައިވެއެވެ.
މި އެޕްލިކޭޝަންގެ މަޤްޞަދު އެންމެ ފުރިހަމަ ގޮތުގައި ޙާޞިލު ވާނީ ، އާސަންދަ ސްކީމްގެ ޚިދުމަތްދޭ އެންމެހާ ތަންތަނުން ހޯދާ ޚިދުމަތްތަކުގެ ތަފްޞީލު ފެންނަން ހުރުމުން ކަމަށް އާސަންދައިން ބުނެފައި ވެއެވެ.
Ads by STO
