ފަރީދީ މަގުގައި އޮތް ކާރެއް ތެރެއިން ގިނަ އަދަދެއްގެ މަސްތުވާތަކެތި ފެނިއްޖެ
ފަރީދީ މަގުގައި ޕާކްކޮށްފައި އޮތް ކާރެއްގެ ޑިކީގެ ތެރެއިން ގިނަ އަދަދެއްގެ މަސްތުވާތަކެތި ފެނިގެން ފުލުހުން ހަރަކާތްތެރި ވެއްޖެއެވެ.
ފަރީދީމަގު އެފްޑީއައި ކައިރީ ބޮޑު ސަރަހައްދެއް ފުލުހުން ބަންދުކޮށްފައި ވާއިރު އެ ކާރު ފުލުހުން ބަލައި ފާސްކުރީ ހަ މީހެއްގެ ހާޒިރުގައެވެ.
އޮންލައިން ނޫސް "ސަން" އިން ބުނެފައިވަނީ ކާރުގެ ޑިކީގެ ތެރޭގައި ދެ ގޯނި ހުރިތަން ފެނުނު ކަމަށް އެނގިފައިވާ ކަމަށެވެ.
މިކަމާއި ގުޅޭގޮތުން ޕޮލިސް ކޮމިޝަނަރު މުހައްމަދު ހަމީދު (އެމްސީ ހަމީދު) ޓްވީޓެއް ކުރައްވައި ވިދާޅުވީ، ފަރީދީމަގުގެ ބޮޑު ބައެއް ފުލުހުން ބަންދުކޮށްފައި ވަނީ ރާއްޖެ ސުމަގުލްކޮށްފައިވާ ކަމަށް ބެލެވޭ މަސްތުވާތަކެތި އެ ސަރަހައްދުގައި އޮތް ކާރަކުން ފެނިގެން ފޮރެންސިކް ތަހުލީލުތަކެއް ކުރުމަށްޓަކައި ކަމަށެވެ.
މިއީ ފުލުހުންގެ އެކި ޔުނިޓްތައް ގުޅިގެން ކަނޑާއި އެއްގަމުގައި ހިންގި އޮޕަރޭޝަނެއްކަން ފާހަގަ ކުރައްވާ ކޮމިޝަނަރު ވިދާޅުވީ އެ އޮޕަރޭޝަންގައި ޑްރަގު ނެޓްވޯކެއްގައި ހިމެނޭ 10 މީހަކު މިހާތަނަށް ހައްޔަރު ކޮށްފައިވާ ކަމަށެވެ.
