"ޑްރަގްގެ ކުށުގައި ހިފޭ މީހުން ވަރަށް އަވަހަށް މިނިވަންވޭ"
މަސްތުވާތަކެތީގެ މައްސަލަތަކުގައި ހައްޔަރުކުރާ މީހުން ވަރަށް އަވަހަށް މިނިވަން ވާކަން ފާހަގަކުރައްވައި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ޢުމަރު ކަންބޮޑުވުން ފާޅު ކުރައްވައިފިއެވެ.
މިއަދު މާލޭގައި ހިންގި މަސްތުވާތަކެތީގެ އޮޕަރޭޝަނެއްގައި ވަނީ 71 ކިލޯގެ މަސްތުވާތަކެތި ހޯދައި 10 މީހަކު ހައްޔަރުކޮށްފައެވެ.
މިކަމާ ގުޅިގެން އޮންލައިން ނޫހަކުން ޝާއިއުކުރި ހަބަރެއް ހިއްސާ ކުރައްވައި އާދަމް ޝަރީފް ވިދާޅުވީ އެކި ޑީލްތައް ހަދައިގެން ޑްރަގްގެ ކުށުގައި ހިފޭ މީހުން ވަރަށް އަވަހަށް މިނިވަން ވާ ކަމަށެވެ. އަދި އެކަމުގެ ސަބަބުން ރާއްޖެއަށް ޑްރަގް ވަންނަ ދޮރުތައް ގިނަ ވާކަމަށް ވެސް އާދަމް ޝަރީފް ވިދާޅުވިއެވެ.
"މުޖުތަމައުއާއި އާއިލާ ޑްރަގްގެ ވަބާއިން ސަލާމަތް ކުރެވޭނީ ހަރުކަށި ފިޔަވަޅު އެޅި ގާނޫނު ތަންފީޒުކޮށްގެން" ކުރީގެ ސަރުކާރުގެ ޑިފެންސް މިނިސްޓަރުކަން ވެސް ކުރެއްވި އާދަމް ޝަރީފް ވިދާޅުވިއެވެ.
މިއަދު ހިންގި އޮޕަރޭޝަނާ ގުޅޭގޮތުން ކޮމިޝަނަރ އޮފް ޕޮލިސް މުޙައްމަދު ޙަމީދު ކުރެއްވި ޓްވީޓެއްގައި ވިދާޅުވެފައިވަނީ ރާއްޖެއަށް ސުމަގުލްކޮށްފައިވާ ކަމަށް ބެލެވޭ 71 ކިލޯގެ މަސްތުވާތަކެތި އަތުލައިގަތްފައިވާ ކަމަށެވެ.
ފުލުހުންގެ ޑްރަގް އެންފޯސްމަންޓާއި އެހެން ޔުނިޓުތަކަކުން ކުރިއަށް ގެންދިޔަ މިއޮޕަރޭޝަންގައި، އެތަކެތި ފެނިފައި ވަނީ ކާރެއްގެ ޑިކީ ތެރެއިންނެވެ.
