މިވެރިކަން އުފެދުނީ ވެސް ކޮރަޕްޝަންގެ ތެރެއިން : އާދަމް ޝަރީފް
ރައީސް އިބްރާހިމް މުހައްމަދު ސޯލިހުގެ ވެރިކަން އުފެދިގެން އައީ ވެސް ކޮރަޕްޝަންގެ ތެރެއިން ކަމުގައި މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވެއްޖެއެވެ.
މި ސަރުކާރު އައި ފަހުން ކޮރަޕްޝަން އިތުރު ނުވާ ކަމަށާއި ރިޕޯޓުކުރި މިންވަރު އިތުރުވީ ކަމުގައި ރައީސް ސޯލިހު ވިދާޅުވުމާ ގުޅިގެން އެކަމަށް ފާޑުވިދާޅުވެ، އާދަމް ޝަރީފް ކުރެއްވި ޓްވީޓުގައި ވަނީ ރިޕޯޓުކުރެވޭ ކޮރަޕްޝަންގެ މައްސަލަތައް ފިޔަވަޅުތަކަށް ނޭޅެނީ ކީއްވެތޯ ސުވާލު ކުރައްވާފައެވެ.
"ވެރިކަމަށް އައީ ރައީސް ޔާމީން ގެ ވެރިކަން ބަގާވާތުން ވައްޓާލަން މަސައްކަތް ކުރި މީހުންނާއެކު ޑީލް ހަދައި، ވަގު ފައިސާ އިން ކެމްޕެއިން ކޮށްގެން ނޫންތޯ" މިވެރިކަން އުފެދުނީ ކޮރަޕްޝަންގެ ތެރެއިން ކަމަށް ވިދާޅުވެ، އާދަމް ޝަރީފް ކުރެއްވި ޓްވީޓުގައި ވިދާޅުވިއެވެ.
ބައިނަލްއަޤްވާމީ ކޮރަޕްޝަނާ ދެކޮޅަށް މަސައްކަތްކުރާ ދުވަހާ ގުޅުވައިގެން ކުރިއަށް ގެންދިޔަ ޓްރާންސްޕޭރެންސީ އެންޑް އެންޓި-ކޮރަޕްޝަން ކޮންފަރެންސް 2020 ނިންމުމުގެ ރަސްމިއްޔާތުގައި ދެއްވި ވީޑިއޯ މެސެޖެއްގައި ރައީސް ޞާލިޙު ވިދާޅުވީ، މިހާރު ކޮރަޕްޝަން އިތުރުވާހެން ހީވަނީ ރިޕޯޓުކުރާ މިންވަރު އިތުރުވުމުން ކަމަށެވެ.
