އިންތިހާބާ ދިމާކޮށް އަނދުން އަޅުވަން ރަށަށް އަރުވާ ކޭބަލް ރޯލަކީ ތަރައްޤީއެއް ނޫން: ޝުޖާއު
ލޯކަލް ކައުންސިލް އިންތިޚާބާ ދިމާކޮށް ރައްޔިތުންގެ ލޮލުގައި އަނދުން އަޅުވައިގެން، ވޯޓު ހޯދުމުގެ މަޤްސަދުގައި ކޭބަލް ރޯލާއި، ހޮޅިދަނޑި ރަށްރަށަށް އަރުވައިގެން އެއީ ތަރައްޤީކަމަށް ދެއްކުމަށް މަސައްކަތް ކުރި ނަމަވެސް އެކަން ގަބޫލުކުރާނެ ރައްޔިތަކު ރާއްޖޭގައި ނެތްކަމަށް ޕީއެންސީގެ ނައިބު ރައީސް އިބްރާހިމް ޝުޖާޢު ވިދާޅުވެއްޖެއެވެ.
އިދިކޮޅު ޕީޕީއެމް/ޕީއެންސީ އިން ހއ. ބާރަށުގައި މިރޭ ބޭއްވި ޖަލްސާގައި ވާހަކަ ދައްކަވަމުން ޝުޖާޢު ވިދާޅުވީ ތަރައްޤީއަކީ މިސަރުކާރަށް އެގޭ އެއްޗެއް ނޫން ކަމަށާއި ރަށެއްގައި ހޮޅި ދަނޑިޖަހައި، ކަރަންޓް ރޯލުތަކާއި، އެނޫން ވެސް ތަކެތި ރަށްރަށް ގެންގޮސް އެއީ ތަރައްޤީކަމަށް ދެއްކުމަށް މިސަރުކާރުން މަސައްކަތް ކުރަމުންދާ ކަމަށެވެ. ނަމަވެސް އެއީ ތަރައްޤީކަމަށް ގަބޫލުކުރާނެ ބަޔަކު ނެތްކަމަށާއި، ކުރީގެ ރައީސް ޔާމީން ޢަބްދުލްޤައްޔޫމް ގެނެސް ދެއްވި ތަރައްޤީ އެއްވެސް ރައްޔިތަކަށް އޮޅިފައި ނުވާކަމަށް ވެސް ޝުޖާޢު ވިދާޅުވިއެވެ.
"ކޭބަލް ރޯލު އަރުވާފަ އެއީ ތަރައްޤީއެއް ނޫން. އަޅުގަނޑުމެން ތަރައްޤީ ކިޔަނީ ބުރިޖާއި، ބޮޑެތި ފާލަންތަކާއި، އޭޓީއެމްތަކާއި، މިސްކިތްތަކާއި، ސްކޫލުތަކަށް. އަޅުގަނޑުމެންނަކީ ރަށުގައި ޖަހާ ހޮޅިބުރިއަކީ ތަރައްޤީކަމަށް ގަބޫލު ކުރާ ބައެއް ނޫން." ޝުޖާޢު ވިދާޅުވިއެވެ.
Ads by STO
