ބޯޑަރު ހުޅުވާލި ފަހުން ލައްކައެއްހާ ފަތުރުވެރިން ރާއްޖެ އަތުވެއްޖެ
ކޮވިޑް-19އާ ގުޅިގެން ރާއްޖޭގެ ބޯޑަރުތައް ބަންދު ކުރުމަށްފަހު، އަލުން ހުޅުވާލިފަހުން ގާތްގަނޑަކަށް އެއްލައްކަ ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ރާއްޖޭގެ ބޯޑަރު ބަންދު ކުރުމަށްފަހު އަލުން ހުޅުވާލާފައި ވަނީ މިއަހަރުގެ ޖުލައި މަހުގެ 15 ވަނަ ދުވަހުގައެވެ. އެދުވަހުން ފެށިގެން މިހިނގާ ޑިސެމްބަރު މަހުގެ 9 ވަނަ ދުވަހާ ހަމައަށް 94،543 ފަތުރުވެރިން ރާއްޖެއަށް އައިސްފައިވާ އިރު، މި އަހަރު 477،390 ފަތުރުވެރިން ރާއްޖެއަށް އައިސްފައިވާ ކަމަށް ވެސް އެމިނިސްޓްރީގެ ތަފާސް ހިސާބުތަކުން ދައްކާފައިވެއެވެ.
ޓޫރިޒަމް މިނިސްޓްރީން އާއްމުކޮށްފައިވާ ހިސާބުތަކަށް ބަލާއިރު ރާއްޖޭގެ ބޯޑަރު ހުޅުވައިލުމާއެކީ ރާއްޖެއަށް އަންނަ ފަތުރުވެރިންގެ އަދަދު މަހުން މަހަށް ވަނީ އިތުރުވެފައެވެ. އެގޮތުން މި މަހުގެ ފުރަތަމަ ދުވަހުން ފެށިގެން އިއްޔެއާ ހަމައަށް 18،402 ފަތުރުވެރިން އައިސްފައިވާއިރު އެއީ މިދިޔަ މަހު ރާއްޖެއަށް އައި ޖުމްލަ ފަތުރުވެރިންގެ އަދަދުގެ ދެބައިކުޅަ އެއްބައެވެ.
މީގެއިތުރުން ދުވާލެއްގެ މައްޗަށް ރާއްޖެއަށް އަންނަ ފަތުރުވެރިންގެ އެވަރެޖް އަދަދު އިތުރުވެފައިވާ ކަމަށާއި މި މަހު އެކަނި ވެސް އެވަރެޖް ގޮތެއްގައި ދުވާލަކު 1،743 ފަތުރުވެރިން ރާއްޖެ އަންނަ ކަމަށް ވެސް ތަފާސްހިސާބުތަކުން ދައްކައެވެ. އެއީ މިދިޔަ މަހާ އަޅާ ބަލާއިރު 551 ފަތުރުވެރިންގެ އިތުރުވުމެކެވެ.
ބޯޑަރު ހުޅުވާލި ފަހުން އެންމެ ގިނަ ފަތުރުވެރިން ރާއްޖެއަށް އައިސްފައި ވަނީ ރަޝިޔާއިންނެވެ. ދެވަނައަށް އެންމެ ގިނަ ފަތުރުވެރިން އައިސްފައި ވަނީ އިންޑިއާއިންނެވެ.
