ރާއްޖޭގެ ޓޮޕް އިންބައުންޑް މާކެޓަކަށް ރަޝިއާ
ބޯޑަރު ހުޅުވާލިފަހުން ރަޝިއާއިން ރާއްޖެއަށް އައި ފަތުރުވެރިންގެ އަދަދު އިތުރުވެ ރާއްޖޭގެ ޓޮޕް އިންބައުންޑް މާކެޓަކަށް ރަޝިއާ ވެއްޖެއެވެ.
ޓޫރިޒަމް މިނިސްޓްރީން އާންމު ކޮށްފައިވާ ތަފާސްހިސާބުތައް ދައްކާގޮތުން ބޯޑަރު އަލުން ހުޅުވާލިފަހުން ރާއްޖެއަށް 20,264 ފަތުރުވެރިން އައިސްފައިވެއެވެ. މި އަދަދާއެކު ނޮވެމްބަރު މަހުގެ ނިޔަލަށް ރަޝިއާއިން ރާއްޖެއަށް 46,065 ފަތުރުވެރިން އައިސްފައިވެއެވެ.
އަހަރުގެ މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމުތަކުގެ ތެރޭގައި ޗައިނާ، ޖަރުމަން، ފްރާންސް، އެމެރިކާ، ޖަޕާން އަދި ސްވިޒަލޭންޑް ހިމެނެއެވެ. މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމާ ހަމައަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައި ވަނީ އިޓަލީވިލާތުންނެވެ. ތިންވަނައަށް އެންމެ ގިނަ ފަތުރުވެރިން އައިސްފައިވަނީ އަވައްޓެރި އިންޑިއާއިންނެވެ.
އެގޮތުން މިއަހަރުގެ މިހާތަނަށް އިޓަލީވިލާތުން 45،645 ފަތުރުވެރިން ރާއްޖެ އައިސްފައިވާއިރު އިންޑިއާއިން ވަނީ 44,268 ފަތުރުވެރިން ރާއްޖެ އައިސްފައެވެ.
ކޮވިޑް-19 އާއި ގުޅިގެން ބޯޑަރު ބަންދުކުރި ނަމަވެސް މި އަހަރަށް އަންދާޒާ ކޮށްފައިވާ އަދަދަށް ފަތުރުވެރިން ރާއްޖެ އައުން އެކަށީގެންވާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމު މީގެ ކުރިން ވަނީ ވިދާޅުވެފައެވެ.
އަދި ކޮވިޑް-19 އާއި ގުޅިގެން ބޯޑަރު ބަންދު ކުރުމަށްފަހު އަލުން ޖުލައި މަހު ހުޅުވާލި ފަހުން ފަތުރުވެރިން އައިސްފައިވާ މިންވަރުން އަހަރުު ނިމެންވާއިރަށް ޓޫރިޒަމްގެ ޓާގެޓަށް ކަނޑައަޅާފާއިވާ މިންވަރަށް ވުރެ އިތުރަށް ވެސް ފަތުރުވެރިން އަންނާނެ ކަމަށް ބެލެވޭ ކަމަށް މިނިސްޓަރ ވިދާޅުވެފައިވެއެވެ.
