އެމްޑީޕީން އިސްލާމްދީން ހިމާޔަތް ކުރާނެ : ނިހާދު
ރައީސް އިބްރާހިމް މުހައްމަދު ސޯލިހު އާއި އެމްޑީޕީން ރާއްޖޭގައި އިސްލާމް ދީން ހިމާޔަތްކުރާނެ ކަމަށް ރައްޔިތުން މަޖިލީހުގެ ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވެއްޖެއެވެ.
ނިހާދު މިހެން ވިދާޅުވީ ކޮވިޑް19 ޖެހިގެން ލަންކާގައި ނިޔާވާ މުސްލިމުން ރާއްޖޭގައި ވަޅުލުމާ ދެކޮޅު ހަދައި ރައީސް މައުމޫން ކުރެއްވި ޓްވީޓަކަށް ރައްދު ދެއްވަމުންނެވެ.
"މުސްލިމެއްގެ ޖަނާޒާ ބާއްވައި ދިނުމަށް ކަނޑައެޅިގެން ދެކޮޅު ހެދުމުން ހައިރާންވެ އަންތަރީސް ވީ ތިމާ ނޫނީ ދީން ދަންނަ މީހަކު ނެތް ކަމަށް ދައްކައިގެން އުޅުނު މީހަކަށް ވީމަ. ރައީސް ސޯލިހު އަކީ އިސްލާމް ދީނަށް ލޯބި ކުރައްވާ ބޭފުޅެއް. އެމްޑީޕީއިން އިސްލާމް ދީން ހިމާޔަތްކުރާނެ." ރައީސް ސޯލިހު ޓެގް ކުރައްވައި ނިހާދު ކުރެއްވި ޓްވީޓުގައި ވިދާޅުވިއެވެ.
ލަންކާ މުސްލިމުން ރާއްޖޭގައި ވަޅުލުމާ ދެކޮޅަށް ކުރީގެ ރައީސް މައުމޫން އަބްދުލްގައްޔޫމް ވަނީ ވާހަކަ ދައްކަވާފައެވެ.
މައުމޫން ރޭ ވިދާޅުވެފައި ވަނީ ކޮވިޑް-19 ޖެހިގެން އެހެންް ގައުމުތަކުގައި މަރުވާ މީހުންގެ ހަށިގަނޑުތައް ރާއްޖެ ގެނެސް ވަޅުލުމަކީ އެކަމުގެ ސަބަބުން އެތައް މައްސަލަތަކެއް ކުރިމަތިވެދާނެ ކަމެއް ކަމަށެވެ.
އެފަދަ ކަންތައްތަކެއް ދިމާވެއްޖެނަމަ ރާއްޖެފަދަ ކުޑަ ގައުމަކަށް ކިތަންމެ ކިތަންމެ މައްސަލަތަކެއް ދިމާވެދާނެ ކަމަށާއި ބޮޑު ބައްޔެއް ޖެހިގެން މަރުވާ ބައެއްގެ ހަށިތައް އުފުލާނެ ގޮތެއް އަދި ގެނެސް ވަޅުލުމުގައި އުޅޭނެ ބައެއް އަދި އެ މީހުން ވަޅުލާނެ ތަނެއް ހަމަޖެއްސުމާއި އެ ނޫން ކިތަންމެ ކަމަކީ ކުރަންޖެހޭނެ ބޮޑެތި ބޮޑެތި މަސައްކަތްތައް ކަމަށް ރައީސް މައުމޫން ވިދާޅުވިއެވެ.
މިކަމާ ގުޅޭގޮތުން ފޮރިން މިނިސްޓްރީން ނެރުނު ބަޔާނެއްގައި ބުނެފައި ވަނީ ކޮވިޑް-19 ޖެހިގެން ލަންކާގައި މަރުވާ މުސްލިމުންނަށް އިސްލާމީ އުސޫލުތަކާ އެއްގޮތަށް ޖަނާޒާގެ ކަންތައްތައް ފުރިހަމަ ކުރުމަށް ލަންކާ ސަރުކާރަށް ދަތިތަކެއް ކުރިމަތިވެފައި ވާތީ، ރާއްޖޭގައި ލަންކާގެ މިފަދަ މުސްލިމުންނަށް ޖަނާޒާގެ ކަންތައްތައް ހަމަޖައްސައިދިނުމަށް އެހީތެރިކަން ހޯދުމަށް އެގައުމުގެ ރައީސް ރާޖަޕަކްސަ، ރައީސް އިބްރާހިމް މުހައްމަދު ޞާލިޙަށް ސިޓީއެއް ފޮނުއްވާފައިވާ ކަމަށެވެ.
ދެޤައުމުގެ ރަޙްމަތްތެރިކަމުގެ އިތުރުން އިސްލާމީ އުޚުވަތްތެރިކަން ދެމެހެއްޓުމުގެ ނިޔަތުގައި، ލަންކާ ސަރުކާރުގެ އެދުމާ އެއްގޮތަށް އިންތިޒާމް ކުރެވޭނެ ގޮތެއް އޮތްތޯ ބެލުމަށް ރައީސް ޞާލިހު ގެންދަވަނީ ސަރުކާރުގެ ކަމާ ބެހޭ އިދާރާތަކުގެ މެދުގައި މަޝްވަރާ ކުރައްވަމުން ކަމަށް އެ މިނިސްޓްރީން އިތުރަށް ބުންޏެވެ.
