އަހަރުގެ ފަސް ލައްކަ ވަނަ ފަތުރުވެރިޔާއަށް ހޫނު މަރުހަބާއެއް
2020 ވަނަ އަހަރުގެ ފަސް ލައްކަ ވަނަ ފަތުރުވެރިޔާއަށް ހޫނު މަރުހަބާއެއް ކިޔައިފިއެވެ.
ފަސް ލައްކަ ވަނަ ފަތުރުވެރިޔާއަށް މަރުހަބާ ކިޔުމަށް ވެލާނާ އިންޓަނޭޝަނަލް އެއާޕޯޓްގައި މިއަދު ވަނީ ހާއްސަ ރަސްމިއްޔާތެއް ކުރިއަށް ގެންގޮސްފައެވެ. މި ފަތުރުވެރިޔާ ރާއްޖެ އައިސްފައިވަނީ އެމިރޭޓްސްގެ ފްލައިޓެއްގައެވެ.
އަހަރުގެ މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމުތަކުގެ ތެރޭގައި ޗައިނާ، ޖަރުމަން، ފްރާންސް، އެމެރިކާ، ޖަޕާން އަދި ސްވިޒަލޭންޑް ހިމެނޭއެވެ. މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމާ ހަމައަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވަނީ އިޓަލީވިލާތުންނެވެ.
ކޮވިޑް-19އާ ގުޅިގެން ބޯޑަރު ބަންދުކުރި ނަމަވެސް މި އަހަރަށް އަންދާޒާކޮށްފައިވާ އަދަދަށް ފަތުރުވެރިން ރާއްޖެ އައުން އެކަށީގެންވާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމު މީގެ ކުރިން ވަނީ ވިދާޅުވެފައެވެ.
ފަތުރުވެރިން ރާއްޖެ އަންނަ މިންވަރު އިތުރުވެ، މިއަދު ސަރުކާރުން ކަނޑައެޅި ޓާގެޓަށް ވާސިލްވެވިފައި މިވަނީ ލަފާކުރެވުނު މުއްދަތަށްވުރެ ކުރިންނެވެ. މި އަހަރަށް ސަރުކާރުން ޓާގެޓްކޮށްފައި ވަނީ ވެސް ފަސް ލައްކަ ފަތުރުވެރިންނެވެ.
އަންނަ އަހަރަށް ޓޫރިޒަމް މިނިސްޓްރީ އިން ކަނޑައަޅާފައިވާ ޓާގެޓަކީ 1.5 މިލިއަން ފަތުރުވެރިންނެވެ. ބޯޑަރު އަލުން ހުޅުވާލިފަހުން މިހާތަނަށް ރާއްޖެ އައި ފަތުރުވެރިންގެ އަދަދު ވަނީ އެއް ލައްކައިން މައްޗަށް އަރާފައެވެ.
