ހޭރާ ފޭރީ 3 ގެ މަސައްކަތް ހުއްޓާލީ ކީއްވެ؟
މަޝްހޫރު ކޮމެޑީ ފިލްމު ސީރީޒް އެއް ކަމަށްވާ "ހޭރާ ފޭރީ"ގެ ފިލްމުތަކަކީ ގިނަ ބައެއްގެ މަގުބޫލުކަން ހޯދާފައިވާ ފިލްމުތަކެކެވެ. މި ސީރީޒްގެ ފުރަތަމަ ފިލްމު ނިކުތްތާ 20 އަހަރު ވެފައި ވާއިރު ވެސް ފިލްމުގެ މަގުބޫލުކަމަށް ކުޑަވެސް ބަދަލެއް ނާދެއެވެ.
ހޭރާ ފޭރީގެ ތިން ވަނަ ފިލްމެއް އުފައްދަން އުޅޭ ކަމުގެ ވާހަކަ 2018 ވަނަ އަހަރުގެ ތެރޭގައި ވަރަށް ގަދައަށް ދެކެވުނެވެ. އަދި އެ އަހަރު މި ފިލްމުގެ ޝޫޓިން ވެސް ފެށުނު ކަމަށް ރިޕޯޓުތައް ބުނެއެވެ.
އޭގެ ކުރީގެ ދެ ފިލްމުން ފެނިގެން ދިޔަ އަކްޝޭއާ ނުލާ ތިންވަނަ ފިލްމުގެ ޝޫޓިން ފެށީ ޖޯން އަބްރަހަމް އާއި އަބީޝޭކް ބައްޗަން ހިމަނައިގެންނެވެ.
ނަމަވެސް މާ ގިނަ ދުވަސްތަކެއް ނުވެ މި ފިލްމުގެ ޝޫޓިންތައް ހުއްޓުނީ ފިލްމުގެ ޕްރޮޑިއުސަރުންނަށް ދިމާވި މާލީ ދަަތިތަކެއްގެ ސަބަބުން ކަމަށް އޭރު ވާހަކަ ދެކެވުނެވެ.
މީގެ އިތުރުން ވެސް ބައެއް ރިޕޯޓުތައް ބުނާ ގޮތުގައި ފިލްމު ކުރިއަށް ނުގެންދެވުނު އިތުރު ސަބަބަކީ އަކްޝޭ ކުމާރު މި ފިލްމު ނުކުޅުމެވެ. އަކްޝޭއަށް މި ފިލްމު ކުޅުމުގެ ފުރުސަތު ދިން ނަމަވެސް ފިލްމު އޭނާ ކުޅެން ހުށަހެޅީ ފިލްމުގެ 70 އިންސައްތަ ފައިދާ އޭނާއަށް ދޭ ގޮތަށެވެ. ނަމަވެސް ފިލްމުގެ ޕްރޮޑިއުސަރުން މިގޮތަށް އެއްބަސްވުމަށް ވަނީ ދެކޮޅު ހަދާފައެވެ.
ހޭރާ ފޭރީގެ އިތުރު ފިލްމެއް ފެންނާނެ ކަމަަށް ގިނަ ފޭނުން އަދިވެސް އަންނަނީ އިންތިޒާރު ކުރަމުންނެވެ.
ހޭރާ ފޭރީ" ގެ ފުރަތަމަ ފިލްމު ރިލީޒު ކޮށްފައި ވަނީ 2000 ވަނަ އަހަރު އެވެ. އަދި އޭގެ ދެވަނަ ފިލްމު "ފިރް ހޭރާ ފޭރީ"ގެ ނަމުގައި 2006 ވަނަ އަހަރު ރިލީޒް ކޮށްފައި ވާއިރު، މީގެ ކުރިން އުފެއްދި "ހޭރާ ފޭރީ" ގެ ދެ ފިލްމުގައި ވެސް ލީޑު ރޯލުން އަކުޝޭއާއެކު ސުނިލް ޝެޓީ އާއި ޕަރޭޝް ރާވަލް ފެނިގެން ގޮސްފައި ވެއެވެ.
