ރަޝިޔާ ސަރަހައްދުން ހާހަކަށް ވުރެ ގިނަ ފަތުރުވެރިން، މިއީ ރެކޯޑް އަދަދެއް
ރަޝިޔާ އާއި ޔުކްރެއިނުން މިއަދު ތިން ފްލައިޓެއްގައި ހާހަކަށް ވުރެ ގިނަ ފަތުރުވެރިން އަންނާނެ ކަމަށް އެ ޓޫރިސްޓުން ގެންނަ ލޯކަލް އެޖެންޓް ބުނެފިއެވެ. މިިއީ ކޮވިޑަށް ފަހު އެއް ސަރަހައްދަކުން އެންމެ ގިނަ ފަތުރުވެރިން އަންނަ ދުވަހެވެ.
މިއީ ރާއްޖޭގެ ޓޫރިޒަމް ހަޔާތުގައި ވެސް އެ ސަރަހައްދުން އެއްފަހަރާ އެންމެ ގިނައިން ފަތުރުވެރިން އަންނަ ދުވަހެވެ. ރާއްޖޭގެ ބޯޑަރު ހުޅުވާލި ފަހުން މިހާތަނަށް ރެކޯޑް ކުރެވޭނެ އެންމެެ ގިނަ ޓްރެފިކް މޫވްމެންޓްސް އެންމެ މަތިވާނެ ދުވަހަކީ މިއަދާއި މާދަމާ ކަމަށް އެމްއޭސީއެލް އިން ވެސް ވަނީ ބުނެފައެވެ. މިއާއެކު އެމްއޭސީއެލްގެ ޓީމުން އޮޕަރޭޝަންގައި ހަރަކާތްތެރިވުމަށް ތައްޔާރަށް ތިބި ކަމަށް އެ ޓްވީޓްގައި ވެއެވެ.
ބޯޑަރު ހުޅުވާލިފަހުން ރަޝިއާއިން ރާއްޖެއަށް އައި ފަތުރުވެރިންގެ އަދަދު އިތުރުވެ ރާއްޖޭގެ ޓޮޕް އިންބައުންޑް މާކެޓަކަށް ރަޝިއާ ވެފައިވާ ކަން ވެސް މީގެ ކުރިން ޓޫރިޒަމް މިނިސްޓްރީން ވަނީ އާންމުކޮށްފައެވެ.
ލޯކަލް އެޖެންޓް، ރިސޯޓް ލައިފްގެ ވެރިޔާ މުހައްމަދު ޝާޒް ވަލީދު ވިދާޅުވީ، މިއަދު ރަޝިޔާގެ އެއް ފްލައިޓާއި ޔޫކްރެއިންގެ ދެ ފްލައިޓެއް އަންނާނެ ކަމަށެވެ. އަދި މިއަދު ތިން ފްލައިޓު އަންނަ އިރު އަންނަ ޖެނުއަރީ މަސް ނިމެންދެން ކޮންމެ ހަފްތާއަކު ޔޫކްރެއިންގެ ތިން ފްލައިޓް ރާއްޖެ އަންނާނެ ކަމަށް ޝާޒް ވިދާޅުވިއެވެ.
ރާއްޖޭގެ ބޯޑަރު އަލުން ހުޅުވާލިފަހުން ޑިސެމްބަރ މަހުގެ ފުރަތަމަ 23 ދުވަހު ރާއްޖެއަށް 66،000އަށް ވުރެ ގިނަ ފަތުރުވެރިން ވަނީ އައިސްފައެވެ. މިއާއެކު ރާއްޖޭގެ ބޯޑަރު އަލުން ހުޅުވާލި ފަހުން ރާއްޖެ އައި ފަތުރުވެރިންގެ އަދަދު 142,210 އަށް އަރާފައިވެއެވެ. ޓޫރިޒަމް މިނިސްޓްރީން އާންމު ކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން ޑިސެމްބަރ މަހުގެ އެއްވަނަ ދުވަހުން 23 ވަނަ ދުވަހަށް 66،069 ފަތުރުވެރިން ވަނީ ރާއްޖެއައިސްފައެވެ.
