ރަނގަޅު ގޮތަކީ މަހުގެ ވިޔަފާރިން ސަރުކާރު ނުކުތުން: ރައީސް ޞާލިޙު
މަސްވެރިކަމުގެ ސިނާޢަތަށް ވެސް އެންމެ ރަނގަޅު ގޮތަކީ ފަތުރުވެރިކަމުގެ ސިނާޢަތެކޭ އެއްފަދައިން، އެވިޔަފާރިން ސަރުކާރު ނުކުމެ އަމިއްލަ ވިޔަފާރިވެރިންގެ އަތްމައްޗަށް ދޫކޮށްލުން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
"ޤައުމީ އެއްބައިވަންތަ ކަމުގެ ދުވަހުގެ" މުނާސަބަތުގައި މިރޭ ޖުމްހޫރީ މައިދާނުގައި ކުރިއަށްދާ ޖަލްސާ ގައި ވާހަކަފުޅު ދައްކަވަމުން ރައީސް ޞާލިޙު ވަނީ މަސްވެރިންގެ ޝަކުވާތަކާއި ގުޅޭގޮތުން ވަރަށް ތަފަސީލްކޮށް ވާހަކަފުޅު ދައްކަވާފައެވެ.
އެގޮތުން ރައީސް ޞާލިޙު ވިދާޅުވީ ރާއްޖޭގެ އިގްތިސޯދު އަލުން ކޮޅަށް ޖެހުމަށް ކުރާ މަސައްކަތުގައި، އެންމެ އިސްކަމެއް ދޭންޖެހިފައިވާ އެއް ދާއިރާއަކީ މަސްވެރިކަން ކަމަށާއި ރާއްޖޭގެ ފަތުރުވެރިކަމެކޭ އެއްގޮތަށް، ރާއްޖޭގެ ދޮށީގެ މަސްވެރި ކަމަކީ ވެސް، މިހާރަށްވުރެ ވެސް ބޮޑަށް، ދުނިޔޭގެ މަގުބޫލުކަން ހޯދޭނެ ސިނާއަތެއް ކަމަށެވެ.
ރައީސް ޞާލިޙު ވިދާޅުވީ މަސްވެރިކަމުގެ ސިނާއަތަށް ވެސް އެންމެ ފައިދާ ހުރި ގޮތަކީ، ފަތުރުވެރި ކަމެކޭ އެއްގޮތަށް، އެ ވިޔަފާރިން ސަރުކާރު ނުކުމެ، އަމިއްލަ ވިޔަފާރިވެރިންގެ އަތްމައްޗަށް ދޫކޮށްލުން ކަމަށެވެ. ނަމަވެސް މިވަގުތަކީ އެކަން އެގޮތަށް ކުރަން އެންމެ ރަނގަޅު ވަގުތު ކަމަށް އެމަނިކުފާނަށް ގަބޫލުނުކުރޭ ކަމަށް ވެސް ރައީސް ޞާލިޙު ވިދާޅުވިއެވެ.
"މި ވަގުތު އެކަން ކޮށްފި ނަމަ، މަސްވެރި ކަމަށް ބޮޑެތި ލޯނުތައް ނަގައި އިންވެސްޓް ކޮށްގެން ތިބި އެތައް އޮޑިވެރިންނެއް ބަނގުރޫޓުވެދާނެ ކަމުގެ ބިރު އެބައޮތް," ރައީސް ޞާލިޙު ވިދާޅުވިއެވެ.
