އަޅުގަނޑުމެންނަކީ ބްރިޖު އަޅާ ޕާޓީ، އެމްޑީޕީ އަކީ ހުޅުޖަހާ ޕާޓީ: ޑރ. ޖަމީލު
އިދިކޮޅު ޕީޕީއެމް/ޕީއެންސީ އަކީ ރާއްޖޭގެ ތަރައްޤީ އަށް މަސައްކަތް ކުރައްވާ ސިޔާސީ ޕާޓީ ކަމަށާއި އެހެން ނަމަވެސް ސަރުކާރު ހިންގާ މައިޕާޓީ އެމްޑީޕީ އަކީ "ހުޅުޖަހާ ޕާޓީ" ކަމަށް ކުރީގެ ނައިބު ރައީސް ޑރ. މުޙައްމަދު ޖަމީލު އަހުމަދު ވިދާޅުވެއްޖެއެވެ.
އިދިކޮޅުން އިންތިޒާމު ކޮށްގެން ކާނިވާ ސަރަޙައްދުގައި "ވިސްނާ" ގެ ނަމުގައި މިރޭ ބާއްވާފައިވާ ޖަލްސާގައި ވާހަކަ ދައްކަވަމުން ޑރ. ޖަމީލު ވިދާޅުވީ އިންތިޤާލީ އިންސާފުގެ ބިލު ރަނގަޅަށް ތަންފީޒު ވެގެން ހިނގައްޖެ ކަމުގައިވާނަމަ، ރައީސް ނަޝީދު އެއްވެސް ޝައްކެެއް ނެތް ގޮތުގައި 1000 އަހަރު ޖަލުގައި އޮންނަވާނެ ކަމަށެވެ.
މިރޭގެ ޖަލްސާގައި ޑރ. ޖަމީލު ވިދާޅުވީ އިދިކޮޅު ޕްރޮގްރެސިވް ކޯލިޝަނަކީ "ބްރިޖު އަޅާ ޕާޓީ" ކަމަށާއި އެމްޑީޕީ އަކީ "ހުޅު ޖަހާ ޕާޓީ" ކަމަށެވެ.
"އަޅުގަނޑުމެންނަކީ ބްރިޖު އަޅާ ޕާޓީ، އަޅުގަނޑުމެންނަކީ ހޮސްޕިޓަލު އިމާރާތް ކުރާ ޕާޓީ، އަޅުގަނޑުމެންނަކީ ބަނދަރުތައް ހަދާ ޕާޓީ، އަޅުގަނޑުމެންނަކީ ސްކޫލްތައް ހަދާ ޕާޓީ، އަޅުގަނޑުމެންނަކީ އެއާޕޯޓުތައް އަޅާޕާޓީ. އެމްޑީޕީ އަކީ ހުޅުޖަހާ ޕާޓީ، އެމްޑީޕީ އަކީ އިންސާފަށް ހުރަސް އަޅާ ޕާޓީ، އެމްޑީޕީއަކީ ފަނޑިޔާރުން ވަގަށް ނަގާ ޕާޓީ، އެމްޑީޕީ އަކީ ބޯން ވާނޭ ހަމައިގައި ހުންނަން ނުވާނޭ ބުނާ ޕާޓީ"ޑރ. ޖަމީލު ވިދާޅުވިއެވެ.
ޑރ. ޖަމީލުގެ ވާހަކަފުޅު ނިންމަވާލައްވަމުން ވިދާޅުވީ "ރާއްޖެ ހޯދަން" ށާއި "ރާއްޖެ މިނިވަން ކުރަން" ހުރިހާ ރައްޔިތުން ތެދުވުމަށް އެދިލައްވާ ކަމަށެވެ. އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް އިންސާފު ހޯދައިދޭން ވެސް މަސައްކަތް ކުރުމަށް ވެސް ޑރ. ޖަމީލު އެދިވަޑައިގަތެވެ.
