ލޯބިވެރިޔާ އާއެކު ލަވަކިޔަން އުޅެނިކޮށް އިސްތަށިގަނޑުގައި ރޯވީ އަލިފާން!
މެޑްރިޑުގައި ދެލޯބިވެރިން “ކްރިސްމަސް” ފާހަގަ ކުރުމަށް ލަވަ ކިޔަން ތިއްބާ އަންހެން މީހާގެ އިސްތަށިގަޑުގައި އަލިފާން ރޯވެއްޖެއެވެ.
“އެންޑީޓީވީ” އިން މައުލޫމާތު ލިބިފައިވާ ގޮތުގައި ސޯފިޔާ ކިޔާ މި އަންހެން މީހާއަކީ އަމިއްލައަށް ލަވަ ކިޔުމުގެ އިތުރުން ލަވަ ކިޔާ ވެސް އުޅޭ އަންހެނެކެވެ. އަދި އިންސްޓަގުރާމް ފޮލޯވާޒް އަށް މި ލަވަ ދެއްކުމުގެ ގޮތުން ލަވަ ކިޔަން ވެސް އިނީ ވީޑިއޯ ޖައްސައިގެންނެވެ. އަދި އަލިފާން ރޯވި މަންޒަރު ވެސް ވީޑިއޯއަށް ވަނީ އަރައިފައެވެ.
ވީޑިއޯގައި ފެންނަ ގޮތުން، ސޯފިޔާއާއި އޭނަ ގެ ލޯބިވެރިޔާ ދެމީހުން ލަވަ ކިޔަމުން ދިޔަ ވަގުތު ސޯފިޔާގެ ފުރަގަހުގައި އުއްބައްތި ތަކެއް ވެސް ހުއްޓެވެ. އަދި ލަވައިގެ މެދުތެރެއިން ސޯފިޔާ ހަމަޖެހިލުމަށް ހަދާލި ގޮތަކުން އިސްތަށިގަނޑުގައި އަލިފާން ރޯވާ މަންޒަރު ވީޑިއޯއިން ފެނިގެން ދެއެވެ.
ސޯފިޔާއަށް އަލިފާން ރޯވިކަން އިހުސާސް ކުރެވުނީ އިސްތަށިގަނޑުގެ ވަކި ހިސާބަކަށް އަލިފާނުގެ އަސަރު ފޯރައި، އޭނަގެ ލޯބިވެރިޔާއަށް އެމަންޒަރު ފެނި، ސިއްސައިގެން ދިޔަ މަންޒަރު ފެނުމުންނެވެ.
ސޯފިޔާ ވަނީ މި ވީޑިއޯ އިންސްޓަގުރާމުގައި ހިއްސާ ކޮށްފައެވެ. އަދި އެކަމާ އޭނާ ބިރު ގަތުމަށް ވުރެ ބޮޑަށް ހިނިއައި ކަމަށާއި އަދިވެސް އެކަމާ ދޭތެރޭ ވިސްނައިފައި ހިނި އަންނަ ކަމަށް އެ ޕޯސްޓުގައި އޭނާ ލިޔެފައި ވެއެވެ. އަދި މި ވީޑިއޯ އިންސްޓަގުރާމަށް ހިއްސާކުރުމާއެކު ކުޑަ ވަގުތުކޮޅެއްގެ ތެރޭގައި ގިނަ އަދަދެއްގެ މީހުން އެވީޑިއޯ ބަލައިފައި ވާކަމަށް ވެސް ޚަބަރުގައި ވެއެވެ.
Ads by STO
