ކަރަންޓީން ނުވެ މީހުންނަށް ކޮވިޑް-19 ޖެއްސި ކަމުގެ ތުހުމަތުގައި މީހަކު ހައްޔަރަށް
ކޮވީޑް-19 އަލާމާތްތައް ފެނުނު ނަމަވެސް، ކަރަންޓީން ނުވެ، އިތުރު 22 މީހުންނަށް ކޮވިޑް-19 "ޖެއްސި" ކަމުގެ ތުހުމަތުގައި ސްޕެއިނުން މީހެއް ހައްޔަރު ކޮށްފިއެވެ.
40 އަހަރުގެ މި މީހާ ހައްޔަރުކޮށްފައި ވަނީ ކޮވިޑް-19ގެ އަލާމާތްތަކުގެ ތެރެއިން ގަދައަށް ހުން އައުމާއި ކެއްސާ ހެދި ނަމަވެސް، އަމިއްލަ އަށް ކަރަންޓީން ނުވެ، ކޮވިޑް-19 ޖައްސާނެ ކަމަށް ބުނެ އޭނާ މަސައްކަތް ކުރަމުން އަންނަ ޖިމްގެ ބައެއް މީހުންނާ ދިމާޔަށް ކެއްސުމާ ގުޅިގެންނެވެ.
ސްޕެއިންގެ ފުލުހުން ބުނެފައި ވަނީ މިމީހާގެ ފަރާތުން ކޮވިޑް-19 ގެ އަލާމާތްތައް ފެންނަމުން އަންނަތާ ދެތިން ދުވަސްވީއިރު ވެސް ޓެސްޓް ހަދަން ދެކޮޅު ހެދި ކަަމަށާއި އަދި ޓެސްޓް ހެދުމަށް އެދުނު މީހުންގެ ގަޔަށް ކެއްސާ ހަދައިފައިވާ ކަމަށެވެ.
ސްޕެއިންގެ މަނަކޯގެ ޖިމެއްގައި މަސައްކަތް ކުރަމުން އަންނަ މި މީހާ ކޮވިޑް-19 ޓެސްޓް ހަދައިފައި ވަނީ ޓެސްޓް ނުހަދައިފި ނަމަ ވަޒީފާއިން ވަކި ކުރާނެ ކަމުގެ އިންޒާރު ދިނުމުންނެވެ. އަދި ޓެސްޓް ހެދުމަށް ފަހު ވެސް ގޭގައި މަޑުނުކޮށް މި މީހާ ވަނީ މަސައްކަތު ނުކުމެފައެވެ. އަދި ކޮވިޑް-19 ޖައްސާނެ ކަމަށް ބުނެ މީހުންނާ ދިމާއަށް މީނާ ވަނީ ކެއްސާފައެވެ.
40 އަހަރުގެ މިމީހާއަށް ކޮވިޑް-19 ފައްސިވިކަން އެނގުނު ހިސާބުން އެ ޖިމްގައި މަސައްކަތް ކުރާ މީހުން ފުލުހުންނަށް ވަނީ މައްސަލަ ހުށަހަޅައިފައެވެ. މިމީހާ ހައްޔަރުކޮށްފައި ވަނީ އޭނާގެ ސަބަބުން އިތުރު 22 މީހުންނަށް ކޮވިޑް-19 ޖެހުމުގެ ސަބަބުންނެވެ. ކޮވިޑް-19އަށް ފައްސިވި މީހުންގެ ތެރޭގައި އެކުގައި މަސައްކަތް ކުރާ މީހުންގެ އިތުރުން، އޭނާގެ 1 އަހަރުގެ ދަރިފުޅާއި އާއިލާގެ މީހުން ވެސް ހިމެނެއެވެ. ސްޕެއިންގެ ފުލުހުން ބުނެފައި ވަނީ މިފަދަ ކަންކަން ތަކުރާރުވެ ދިޔަ ނުދިނުމަށް ޓަކައި މިމައްސަލަ ވަރަށް ސީރިޔަސް މައްސަލައެއްގެ ގޮތުގައި ބަލާނެ ކަމަށެވެ.
ރާއްޖޭގަ ވެސް އެބަ އުޅޭ ތީގެ ބައިވަރު މީހުން