އިންތިހާބު އަވަސް ކުރުމަށް ދައުރުން ބޭރުން މަޖިލިސް ޖަލްސާއެއް ބާއްވަނީ
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުތައް ބޭއްވުން އަވަސް ކުރުމަށްޓަކައި ލޯކަލް ކައުންސިލް އިންތިހާބުގެ ހާއްސަ ގާނޫނަށް އިސްލާހްތަކެއް ގެނައުމަށްޓަކައި ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް ބޭއްވުމަށް މަސައްކަތް ފަށައިފިއެވެ.
މިކަން ހާމަ ކުރަމުން އެމްޑީޕީގެ ޕާލަމެންޓްރީ ގުރޫޕްގެ ލީޑަރު އަލީ އާޒިމް ވިދާޅުވީ ކައުންސިލް އިންތިހާބު ބޭއްވުން އަވަސް ކުރުމަށްޓަކައި ހާއްސަ ގާނޫނަށް ގެންނަން ޖެހޭ އިސްލާހުތައް ގެނައުމަށް ދައުރުން ބޭރުން މިމަހުގެ 15 ވަނަ ދުވަހު ޖަލްސާއެއް ބޭއްވުމަށް މަސައްކަތް ކުރާ ކަމަށެވެ.
މި ޖަލްސާ ބޭއްވުމަށް މަސައްކަތް ކުރަމުންދާއިރު ކޮވިޑް-19އާ ގުޅިގެން އިއުލާން ކޮށްފައިވާ ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރުކުރުމުން ލޯކަލް ކައުންސިލް އިންތިޚާބު މާޗުމަހުގައި ނުބޭއްވޭނެ ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވަނީ ވިދާޅުވެފައެވެ.
އެހެންނަމަވެސް ޝަރީފް ވިދާޅުވީ ދައުރުން ބޭރުން މަޖިލިސް ޖަލްސާއެއް ބާއްވައި އިސްލާހުތައް ގެނެސް، މި މަސް ނިމުމުގެ ކުރިން އެކަންކަން ތަންފީޒުކޮށްފިނަމަ، އަންނަ އޭޕްރީލް މަހުގެ ތިންވަނަ ދުވަހު އިންތިހާބު ބޭއްވޭނެ ކަމަށެވެ.
ދައުރުން ބޭރުން ބާއްވަން މަސައްކަތް ކުރަމުންދާ ޖަލްސާ ބޭއްވުމަށް އެމްޑީޕީ ޕީޖީގެ ގިނަ މެމްބަރުން ވަނީ ތާއީދު ކުރައްވައި ޖަލްސާ ބޭއްވުމަށް މަސައްކަތް ކުރުމަށް ގޮވާލައިފައެވެ.
