ގަން-ފޮނަދޫ ބޯޑަރު ބަންދުކޮށްފި
ލ. ފޮނަދޫއިން ބަޔަކު ފައްސިވުމާ ގުޅިގެން، ފޮނަދޫއާ ގުޅިފައި އޮންނަ ގަމަށް ހުއްދައާއެކު ނޫނީ ދަތުރު ނުކުރެވޭ ގޮތަށް، "ބޯޑަރު" ބަންދުކޮށްފިއެވެ.
ފޮނަދޫ އާ އިންވެގެން އޮންނަ ކައްދޫ އެއާޕޯޓް ސަރަހައްދުގައި ފުލުހުން މިހާރު ބެރިކޭޑް ޖަހާފައިވާއިރު، ދަތުރު ކުރާ ފަރާތްތަކުން ކައުންސިލްގެ ހުއްދައެއް ހޯދަން ޖެހެއެވެ.
"ކުރިން ފުރަބަންދު ކުރިއިރު ގޮތަށް، މިހާރުވަނީ އަލުން ދެ ރަށު ދޭތެރޭ ޗެކްޕޮއިންޓް ޖަހާފައި" ދެން އަށް މަޢުލޫމާތު ދެއްވަމުން ފޮނަދޫ ކައުންސިލްގެ ރައީސް އަހްމަދު ރިޔާޒް ވިދާޅުވިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނީ، ފޮނަދުއަށް ދަތުރުކުރި ހަތަރު މީހެއްގެ ފަރާތުން ކޮވިޑްގެ އަލާމަތްތައް ފެނިގެން ޕީސީއާރް ޓެސްޓު ހަދާފައިވާ ކަމަށާއި އެ މީހުން އެ ބަޔަށް ޕޮޒިޓިވް ވެފައިވާ ކަމަށެވެ.
އެ މީހުންގެ ކޮންޓެކްޓް ޓްރޭސިން ނިމެންދެން ފޮނަދޫގެ އިތުރުން އެ ރަށާ އެއްފަސް ވެފައިވާ ގަން ވެސް މޮނިޓަރިންގެ ހާލަތަށް ލާފައިވާ ކަމަށް އެޗްޕީއޭ އިން ބުންޏެވެ.
މިކަމާ ގުޅިގެން ފޮނަދޫ އަދި ގަމުން އެއްރަށުން އަނެއް ރަށަށް ނުދެވޭ ގޮތަށް ބޯޑަރު ވަނީ ބަންދު ކޮށްފައެވެ.
މައުލޫމާތު ލިބިފައިވާ ގޮތުގައި، ބޯޑަރު ބަންދުކުރި ނަމަވެސް ފްރޮންޓްލައިން ގައި މަސައްކަތް ކުރާ ފަރާތްތަކަށާއި ޑޮކްޓަރަށް ދެއްކުން ފަދަ ޒަރޫރީ ބޭނުންތަކުގެ އިތުރުން ގަން އަދި ފޮނަދޫ ކައުންސިލުން ދޫކުރާ ހުއްދަ އޮންނަ ފަރާތްތަކަށް އެއް ރަށުން އަނެއް ރަށަށް ދަތުރު ކުރެވޭނެއެވެ.
މީގެ ކުރިން މުޅި ރާއްޖެ ލޮކްޑައުން ކުރުމާ ގުޅިގެން ވެސް ގަން ފޮނަދޫ ބޯޑަރު ބަންދު ކޮށްފައި ވެއެވެ.
