ކޮވިޑް-19: ޔޫއޭއީގައި 1 ދުވަސްތެރޭގައި 78ހާސް މީހުނަށް ވެކްސިން ދީފި
ޔުނައިޓެޑް އަރަބި އެމިރޭޓްސް ނުވަތަ އެކުވެރި އަރަބި އިމާރާތުން 1 ދުވަސް ތެރޭގައި 78 ހާސް މީހުނަށް ކޮވިޑް ވެކްސިން ޖަހައިފިއެވެ.
50 އިންސައްތަ މީހުނަށް ކޮވިޑް ވެކްސިން ދިނުމުުގެ އަމާޒުގައި ވެކްސިން ދޭން ޔޫއޭއީން ފަށާފައިވާއިރު، އެގައުމުގެ މިނިސްޓްރީ އޮފް ހެލްތުން ހާމަކުރި ގޮތުގައި ފާއިތުވި 24 ގަޑިއިރުގެ ތެރޭގައި 78,793 މީހަކަށް ވަނީ ކޮވިޑް ވެކްސިން ޖަހާފައެވެ.
އެއާއެކު އެގައުމުގައި ވެކްސިން ޖެހި މީހުންގެ އަދަދު ވަނީ 1,020,349 އަށް އަރާފައެވެ. އެއީ ކޮންމެ 100 މީހަކަށް 10.32 ޑޯޒްގެ ވެކްސިނެވެ.
ޔޫއޭއީން ވެކްސިން ޖަހަން ފަށާފައިވާއިރު، އެގައުމުގެ ސިއްހަތާ ބެހޭ އިދާރާތަކުން ވަނީ އުމުރުން ދުވަސްވީ މީހުންނާއި ހައި ރިސްކު މީހުންނަށް ވެކްސިން ދިނުމަށް ހާއްސަ ގައުމީ ކެމްޕެއިނެއް ވެސް ފަށާފައެވެ.
ޔޫއޭއީގެ އިތުރުން ވެސް މެދު އިރުމަތީގެ ބައެއް ގައުމުތަކުގައި ވަނީ ކޮވިޑް-19 އަށް ފައިޒާ ވެކްސިން ބޭނުން ކުރަން ފަށާފައެވެ.
ފައިޒަރގެ ވެކްސިނަކީ ކޮވިޑް-19 އަށް 95 އިންސައްތަ ރައްކާތެރިކަން ކަށަވަރުކޮށްދޭ ވެކްސިނެއްކަމަށް އެންމެ ފަހުގެ ޓެސްޓުތަކުން ދައްކައެވެ. ރިޕޯޓްތައް ބުނާ ގޮތުން ފައިޒަރ އަދި ބައޯންޓެކްގެ ވެކްސިން 43،500 މީހުންގެ ގަޔަށް ޖަހާ ޓެސްޓު ކޮށްފައިވެއެވެ. އަދި މި ވެކްސިން ޖެހި މީހުންގެ ދިފާއީ ނިޒާމުގައި ކޮވިޑާ ދެކޮޅަށް މަސައްކަތް ކުރާކަން ފާހަގަ ވެފައިވާ ކަމަށް ސައިންސްވެރިން ބުނެއެވެ.
