ރިޒް ކުންފުނީގެ މައްޗަށް ހިއުމަން ޓްރެފިކިންގެ ދައުވާ ކުރަން ފޮނުވައިފި
ޤަވާއިދާ ޚިލާފަށް ބ. ބޮޑުފިނޮޅުގައި ބިދޭސީން ގެންގުޅުނު މައްސަލައިގައި، ރިޒް ކުންފުނީގެ މައްޗަށް ހިއުމަން ޓްރެފިިންގެ ދައުވާ ކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ފުލުހުން ފޮނުވައިފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ ރިޒް ކުންފުނީގެ މައްޗަށް ތުހުމަތު ކުރެވޭ ހިއުމަން ޓްރެފިކިންގެ މައްސަލަ 2020 ވަނަ އަހަރުގެ ޑިސެމްބަރު މަހުގެ 3 ވަނަ ދުވަހު ޕީޖީ އޮފީހަށް ފޮނުވާފައިވާ ކަމަށެވެ.
ރިޒް ކުންފުންޏަކީ ރައްޔިތުންގެ މަޖިލީހުގެ މިލަންދޫ ދާއިރާގެ މެންބަރު އަލީ ރިޒާ ހިންގަވާ ކުންފުންޏެކެވެ.
ރިސޯޓެއްގެ ގޮތުގައި ތަރައްޤީ ކުރަމުންދިޔަ ބޮޑުފިނޮޅުގައި މަސައްކަތް ކުރަމުންދިޔަ 19 ބިދޭސީއެއް އެއްވެސް ލިޔެ ކިޔުމެއްނެތި، މުސާރަ ވެސް ނުދީ ގެންގުޅެމުން ދިޔަ މައްސަލަ ފުލުހުން ބަލަން ފަށާފައިވަނީ، އެބިދޭސީން އެތަނުގައި މަސައްކަތް ކުރަމުންދިޔަ ތިން ދިވެއްސަކު ރަހީނުކޮށް، ހިންގި ހަމަނުޖެހުމަށް ފަހުގައެވެ.
އެ ރަށުގައި ހިނގި ހަމަނުޖެހުންތަކުގެ އެ މައްސަލަ ފުލުހުން ތަހުގީގު ކުރަން ފެށުމާއެކު މި ކަމުގައި ހިމެނޭ ހިއުމަން ޓްރެފިކިންއަށް ތުހުމަތު ކުރެވޭ ކަންކަން ތަހުގީގު ކުރަމުން އަންނަ ކަމަށް ފުލުހުން އޭރު ވިދާޅުވިއެވެ.
