ބޮޑުފިނޮޅު މައްސަލައިގައި ހިފަހައްޓާފައިވާ 7 ބިދޭސީން ފުރުވާލުމަށް އެއްވެސް އިއުތިރާޒެއް ކޮށްފައެއް ނުވާނެ: ފުލުހުން
މިދިޔަ އަަހަރުގެ ޖުލައި މަހު ބ. ބޮޑުފިނޮޅުގައި އިހުތިޖާޖުކޮށް އެރަށުގައި ތިބި ދިވެހީންތަކެއް ރަހީނުކުރި މައްސަލައިގައި ހައްޔަރުކުރި 19 ބިދޭސީންގެ ތެރެއިން އަދިވެސް ހިފަހައްޓާފައިވާ 7 ބިދޭސީއަކު އެމީހުންގެ ޤައުމަށް އަނބުރާ ފުރުވާލުމަށް ފުލުހުން އެއްވެސް އިއުތިރާޒު ނުކުރާ ކަމަށް ފުލުހުން ވިދާޅުވެއްޖެއެވެ.
ފުލުހުންގެ މީޑިއާ އޮފިޝަލަކު "ދެން" އަށް މައުލޫމާތު ދެއްވަމުން ވިދާޅުވީ، އެބިދޭސީން ފުރުވާލުމަށް ފުލުހުން އެއްވެސް އިއުތިރާޒެއް ކޮށްފައި ނުވާނެ ކަމަށާއި ނަމަވެސް އެ ހަތް ބިދޭސީން އަނބުރާ ޤައުމަށް ފޮނުވާލުމުގެ ތިން ދުވަސް ކުރިން ފުލުހުންނަށް އެންގުމަށް، ޓްރޭޑް މިނިސްޓްރީގައި އެދިފައިވާނެ ކަމަށެވެ.
"އެމީހުން ފުރުވާލުމަކަށް އިއުތިރާޒް ކޮށްފައެއް ނުވާނެ އެހެން ނަމަވެސް އެމީހުން ފުރުވާލުމުގެ 3 ދުވަސް ކުރިން ފުލުހުންނަށް އަންގާލަ ދިނުމަށް އެދިފައި ވާނެ" ފުލުހުން ވިދާޅުވިއެވެ.
މުސާރަ ނުލިބި އެތައް މަހެއް ވެފައިވުމުން އެބިދޭސީންނަށް މުސާރަ ހޯދައި ދިނުމުގައި ގާނޫނީ އެހީތެރިކަން ފޯރުކޮށްދިނުމަށް ޕަބްލިކް އިންޓަރެސްޓް ލޯ ސެންޓަރު (ޕީއައިއެލްސީ) އިން ދަނީ ހިލޭ ސާބަހަށް މަސައްކަތް ކޮށްދެމުންނެވެ.
މި ހަތް ބިދޭސީން އަދިވެސް ތިބީ ހުޅުމާލޭގައި ހުންނަ އާރްޑީސީގެ ފެސިލިޓީއެއްގައި "ހައްޔަރުކޮށްފައި" ކަމަށް ޕީއައިއެލްސީ ގެ އެއް ވަކީލު ކަމަށްވާ މަރިޔަމް ޝުނާނާ "ދެން" އަށް މައުލޫމާތު ދެއްވަމުން ވިދާޅުވިއެވެ.
ޝުނާނާ ވިދާޅުވީ އެ ބިދޭސީން އާރްޑީސީގެ އެސެންޓަރަށް ގެންގޮސްފައި ވަނީ މިދިޔަ އަހަރުގެ އޯގަސްޓް މަސްހާ ހިސާބުގައި ކަމަށެވެ.
"ހައްޔަރުގައި އަނެއްހެން ބުނަންޏާ އެމީހުން އެތިބީ. އެމީހުންގެ ކޭސް އެއް ނުބަލާ. އެމީހުންނަށް އެތަނުން ނުނިކުމެވޭ. އެމީހުން ވެސް އާދޭސް ކުރޭ ތިމަންނަމެންގެ ޢާއިލާ ކައިރިއަށް ފޮނުވާދޭށޭ ކިޔާފަ. އެކަމަކު އަދިވެސް ނުފޮނުވާ" ޝުނާނާ ވިދާޅުވިއެވެ.
ޝުނާނާ ވިދާޅުވީ ބޮޑުފިނޮޅުން ހައްޔަރުކުރި ބިދޭސީންގެ ތެރެއިން އަނބުރާ ޤައުމަށް ދާން ބޭނުން މީހުން ޤައުމަށް ފޮނުވާލެވޭނެ ކަމަށް ޓްރޭޑް މިނިސްޓްރީން ބުނި ކަމަށާއި ނަމަވެސް އެމިނިސްޓްރީން ފޮނުވާލަން އުޅުމުން ފުލުހުން ވަނީ އެކަން ހުއްޓުވާފައި ކަމަށެވެ.
"ފުލުހުން ވިދާޅުވެފައިވަނީ ކްރިމިނަލް ކޭސް އަކަށް ހެކިންގެ ގޮތުގައި އެމީހުން ބޭނުންވާ ކަމަށް. ނަމަވެސް އަޅުގަނޑުމެން ފުލުހުންނަށް ސިޓީ ފޮނުވީމަ ރަސްމީކޮށް ސިޓީގެ ޖަވާބުގައި ވިދާޅުވެފައިވަނީ ފުލުހުން ނުހިފަހައްޓާ ކަމަށް. އަދި ތިން ދުވަސް ތެރޭ އަންގާލާފައި އެމީހުން ފުރުވާލެވޭނެ ކަމަށް" ޝުނާނާ ވިދާޅުވިއެވެ.
ޝުނާނާ ވިދާޅުވީ، ގިނަ ދުވަސްތަކެއް ވަންދެން ތަނެއްގައި ބަންދު ވެފައި ހުންނަން ޖެހުމުން، އެ ބިދޭސީންނަށް ނަފްސާނީ ގޮތުން ވެސް އަސަރު ކޮށްފައިވާ ކަމަށެވެ.
