ބޮޑުފިނޮޅު މައްސަލައިގައި ހިފެހެއްޓި 7 ބިދޭސީއެއް، އާރްޑީސީ ފެސިލިޓީގައި "ބަންދުވެފައި "
މިދިޔަ އަަހަރުގެ ޖުލައި މަހު ބ. ބޮޑުފިނޮޅުގައި އިހުތިޖާޖުކޮށް އެރަށުގައި ތިބި ދިވެހީންތަކެއް ރަހީނު ކުރި މައްސަލައިގައި ހައްޔަރު ކުރި 19 ބިދޭސީންގެ ތެރެއިން ހަތް ބިދޭސީއަކު އަދިވެސް ހިފަހައްޓާފައިވާ ކަމަށް މައުލޫމާތު ލިބިއްޖެއެވެ.
މުސާރަ ނުލިބި އެތައް މަހެއް ވެފައިވުމުން އެބިދޭސީންނަށް މުސާރަ ހޯދައި ދިނުމުގައި ގާނޫނީ އެހީތެރިކަން ފޯރު ކޮށްދިނުމަށް ހިލޭ ސާބަހަށް މަސައްކަތް ކުރައްވާ ޕަބްލިކް އިންޓަރެސްޓް ލޯ ސެންޓަރު (ޕީއައިއެލްސީ)ގެ އެއް ވަކީލު މަރިޔަމް ޝުނާނާ ވިދާޅުވީ އޭގެ ތެރެއިން ހަތް ބިދޭސީއަކު ފިޔަވާ އެހެން ހުރިހާ ބިދޭސީން އެމީހުންގެ ޤައުމަށް މިހާރު އަނބުރާ ފޮނުވާލާފައިވާއިރު، މި ހަތް ބިދޭސީން އަދިވެސް ތިބީ ރާއްޖޭގައި ކަމާއި އެމީހުން ތިބީ ހުޅުމާލޭގައި ހުންނަ އާރްޑީސީގެ ފެސިލިޓީއެއްގައި "ހައްޔަރު ކޮށްފައި" ވާ ކަމަށެވެ.
ޝުނާނާ ވިދާޅުވީ އެ ބިދޭސީން އާރްޑީސީގެ އެސެންޓަރަށް ގެންގޮސްފައި ވަނީ މިދިޔަ އަހަރުގެ އޯގަސްޓް މަސްހާ ތަނުގައި ކަމަށެވެ.
"ހައްޔަރުގައި އަނެއްހެން ބުނަންޏާ އެމީހުން އެތިބީ. އެމީހުންގެ ކޭސް އެއް ނުބަލާ. އެމީހުންނަށް އެތަނުން ނުނިކުމެވޭ. އެމީހުން ވެސް އާދޭސް ކުރޭ ތިމަންނަމެންގެ ޢާއިލާ ކައިރިއަށް ފޮނުވާދޭށޭ ކިޔާފަ. އެކަމަކު އަދިވެސް ނުފޮނުވާ" ޝުނާނާ ވިދާޅުވިއެވެ.
ޝުނާނާ ވިދާޅުވީ ބޮޑުފިނޮޅުން ހައްޔަރުކުރި ބިދޭސީންގެ ތެރެއިން އަނބުރާ ޤައުމަށް ދާން ބޭނުން މީހުން ޤައުމަށް ފޮނުވާލެވޭނެ ކަމަށް ޓްރޭޑް މިނިސްޓްރީން ބުނި ކަމަށާއި ނަމަވެސް އެމިނިސްޓްރީން ފޮނުވާލަން އުޅުމުން ފުލުހުން ވަނީ އެކަން ހުއްޓުވާފައި ކަމަށެވެ.
"ފުލުހުން ވިދާޅުވެފައި ވަނީ ކްރިމިނަލް ކޭސް އަކަށް ހެކިންގެ ގޮތުގައި އެމީހުން ބޭނުންވާ ކަމަށް. ނަމަވެސް އަޅުގަނޑުމެން ފުލުހުންނަށް ސިޓީ ފޮނުވީމަ ރަސްމީކޮށް ސިޓީގެ ޖަވާބުގައި ވިދާޅުވެފައި ވަނީ ފުލުހުން ނުހިފަހައްޓާ ކަމަށް. އަދި ތިން ދުވަސް ތެރޭ އަންގާލާފައި އެމީހުން ފުރުވާލެވޭނެ ކަމަށް" ޝުނާނާ ވިދާޅުވިއެވެ.
ޝުނާނާ ވިދާޅުވީ، ގިނަ ދުވަސްތަކެއް ވަންދެން ތަނެއްގައި ބަންދު ވެފައި ހުންނަން ޖެހުމުން، އެ ބިދޭސީންނަށް ނަފްސާނީ ގޮތުން ވެސް އަސަރު ކޮށްފައިވާ ކަމަށެވެ.
މިކަމާ ގުޅޭގޮތުން ފުލުހުންގެ ބަހެއް އަދި ލިބިފައެއް ނުވެއެވެ.
