ލޮކްޑައުން އަނެއްކާވެސް ހަރުކަށި ކޮށްފާނެ، އެކަމަށް ތައްޔާރުވާން ޖެހޭ: ނަޝީދު
މާލޭގައި އިއުލާނު ކޮށްފައިވާ ލޮކްޑައުން އަނެއްކާވެސް ހަރުކަށި ކޮށްފާނެ ކަމަށާއި އެކަމަށް ތައްޔާރުވާން ޖެހޭ ކަމަށް މަޖިލީހުގެ ރައީސް ، ރައީސް މުހައްމަދު ނަޝީދު ވިދާޅުވެއްޖެއެވެ.
މިރޭ އެމްޑީޕީ ޒުވާނުންނާއެކު ވީޑިއޯ ކޮންފަރެންސް މެދުވެރިކޮށް ބޭއްވި ބައްދަލުވުމެއްގައި ނަޝީދު ވިދާޅުވީ ކޮވިޑް-19ގެ މާދަމާގެ ހާލަތު އެއްވެސް ބަޔަކަށް ތަސައްވަރުކޮށްނުލެވޭނެ ކަމަށާއި އެހެންކަމުން ކޮވިޑުގެ ދެވަނަ ރާޅެއް އަރައި، އަލުން އަނބުރާ ރާއްޖެ ލޮކްޑައުންއަކަށް ދާން ޖެހުމަކީވެސް އެކަށީގެންވާ ކަމެއް ކަމަށެވެ.
"ދެވަނަ ރާޅެއް ކުރިމަތިވެ، އަނެއްކާ އަލުން އަނބުރާ ލޮކްޑައުންގެ ހާލަތަށް ދާން ޖެހުމަކީވެސް އަޅުގަނޑަށް ފެންނަ ފެނުމުގައި އެކަށީގެންވާ ކަމެއް. އެހެންވީމާ އަޅުގަނޑުމެން އެންމެން ތައްޔާރުވާން ޖެހޭ،" ނަޝީދު ވިދާޅުވިއެވެ.
މާލެ ސަރަހައްދުގެ ލޮކްޑައުނަށް މިދިޔަ މަހުގެ 28 ވަނަ ދުވަހުން ފެށިގެން ލުއިތަކެއް ދީފައިވާއިރު އެޗްޕީއޭ އިން ބުނެފައި ވަނީ ފިޔަވަޅުތަކަށް ލުއި ދިނުމުގެ ސަބަބުން ބަލި ފެތުރުން އިތުރުވާނަމަ، އަނެއްކާވެސް އެ ފިޔަވަޅުތައް ހަރުކަށިކުރަން ޖެހިދާނެ އެވެ.
