އިދިކޮޅު މުޒާހަރާ އިން ހައްޔަރުކުރި އެންމެން ދޫކޮށްލައިފި
ލޯކަލް ކައުންސިލް އިންތިހާބު އަވަސް ކުރުމަށް ގޮވާލާ އިދިކޮޅު ޕީޕީއެމް/ޕީއެންސީ އިން ކުރި މުޒާހަރާގެ ތެރެއިން ހައްޔަރުކުރި އެންމެން ދޫކޮށްލައިފިއެވެ.
އެ މުޒާހަރާގެ ތެރެއިން 24 މީހަކު ވަނީ ހައްޔަރުކޮށްފައެވެ. އޭގެތެރޭގައި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) އާއި އެ ޕާޓީގެ ނައިބު ރައީސް އިބްރާހިމް ޝުޖާއު ވެސް ހިމެނެއެވެ. ލޯކަލް ކައުންސިލް އިންތިހާބު އަވަސް ކުރުމަށް ގޮވާލާ އިދިކޮޅު ޕީޕީއެމް/ޕީއެންސީ ލީޑަޝިޕުންނާއި ސަޕޯޓަރުން މަގުމައްޗަށް ނުކުމެ ފުރަތަމަ އިހުތިޖާޖު ކޮށްފައިވަނީ މިމަހުގެ 25 ވަނަ ދުވަހުއެވެ.
އިދިކޮޅު ލީޑަޝިޕްގެ ބައެއް ބޭފުޅުންނާއި ގިނަ އަދަދެއްގެ ސަޕޯޓަރުން ޕީޕީއެމް ގެ ދިދަ ހިފައިގެން އިއްޔެ ވަނީ ނުކުމެފައެވެ. އިހުތިޖާޖުގެ ބައިވެރިން ގޮވާލާފައި ވަނީ އިންތިހާބު އަވަސް ކުރުމަށާއި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިނިވަން ކުރުމަށެވެ.
މި އިހުތިޖާޖުގެ ތެރެއިން ފުލުހުން ވަނީ ބައެއް ފަރާތްތަށް ފުލުހުންގެ ބެލުމުގެ ދަށަށް މިއަދު ގެންގޮސްފައެވެ. އޭގެތެރޭގައި އަދުރޭ އާއި ޝުޖާއު ގެ އިތުރުން، ކައުންސިލު މެންބަރ ނަރީޝް، ކައުންސިލު މެންބަރ އަމްސޫދާ މުޙައްމަދު، ކައުންސިލު މެންބަރ ޝަހީދު އިބްރާހިމް، ކައުންސިލު މެންބަރ އައިމިނަތު ފަޒްލާ އަދި ބައެއް ސަޕޯޓަރުން ވެސް ހިމެނެއެވެ.
އިދިކޮޅު ކޯލިޝަނުގެ ތަރުޖަމާނު ހީނާ ވަލީދު ވިދާޅުވީ މުޒާހަރާގެ ތެރެއިން ހައްޔަރުކުރި އެންމެން މިހާރު ދޫކޮށްލާފައިވާ ކަމަށެވެ. ކައުންސިލް އިންތިހާބު ބޭއްވުމަށް ގޮވާލައި އިދިކޮޅުން މުޒާހަރާ ކޮށްފައިވާއިރު، އިންތިހާބު ބާއްވާނެ ތާރީހެއް އިއުލާން ކުރުމަށް އިލެކްޝަންސް ކޮމިޝަނުން އަންނަނީ ތައްޔާރުވަމުންނެވެ.
