މިސްކިތް ހުޅުވަން ލަސްވަނީ ބޭނުންވާ ފަރުނީޗަރު ނެތުމުން: އަހުމަދު ޒާހިރު
ރައީސް ޔާމީނުގެ ވެރިކަމުގައި ސައުދީ ސަރުކާރުން މާލޭގައި އިމާރާތް ކުރި ކިންގް ސަލްމާން މިސްކިތް ނުހުޅުވި ލަސްވުމުގެ ސަބަބަކީ އެތަނަށް ބޭނުންވާ ފަރުނީޗަރު ނެތުމުން ކަމުގައި އިސްލާމިކް މިނިސްޓަރު ޑރ .އަހުމަދު ޒާހިރު ވިދާޅުވެއްޖެއެވެ.
މިސްކިތް ހުޅުވުމަށް މީގެ ކުރިން އެތައް ތާރީޚެއް ކަނޑައެޅިފައިވީ ނަމަވެސް މިހާ ގިނަ ދުވަސްތަކެއް ވެގެން ދިޔައިރު މިއަދާ ހަމައަށް ވެސް އެ މިސްކިތް ނުހުޅުވުމުގެ ސަބަބުން އިދިކޮޅުން އަންނަނީ ނުހުޅުވުމުގެ ސަބަބު ހޯދުމަށް އެތައް މަސައްކަތްތަކެއް ކުރަމުންނެވެ. އެގޮތުން ކުރީގެ ހައުސިންގް މިނިސްޓަރު ޑރ މުހައްމަދު މުއިއްޒު ވެސް ވަނީ މިސްކިތް ހުޅުުން ލަސްވުމާމެދު ސުވާލު އުފައްދަވައިފައެވެ.
މީގެ ކުރިން މިނިސްޓްރީން ބުނެފައިވަނީ މިސްކިތް ހުޅުވުން މަޑު ޖައްސާލެވުނީ ކޮވިޑު-19 ގެ ހާލަތާ ގުޅިގެން ކަމުގައެވެ.
އޮންލައިން ނޫހެއް ކަމަށްވާ "ޖަޒީރާ" އާ ވާހަކަވާހަކަ ދައްކަވަމުން އިސްލާމިކް މިނިސްޓަރު ވިދާޅުވީ، ކުރީ ސަރުކާރު ނިމިގެން ދިޔައިރު މިސްކިތަށް ބޭނުންވާ ތަކެތި ގަންނަން އެއްވެސް ޕްލޭނެއް އެކުލަވާލާފައި ނެތް ކަމަށާއި، ބޭނުންވާ ފަރުނީޗަރާއި، އެހެނިހެން ތަކެތި ހޯދަން ޕްރޮޕޯސަލް އެއް އެކުލަވައިލައިފައި ވަނީ މި ސަރުކާރު އައުމަށް ފަހު ކަމަށް ވިދާޅުވި އެވެ. ޑރ. އަހުމަދު ޒާހިރު ވިދާޅުވީ، މިނިސްޓްރީން ބޭނުންވަނީ ހުރިހާ ސާމާނެއް ހަމަކުރުމަށް ފަހު މިސްކިތް ހުޅުވުން ކަމަށެވެ.
މިނިސްޓަރު އިތުރަށް ވިދާޅުވީ، ފަރުނީޗަރު ގަންނަން ގާތް ގަނޑަކަށް މިލިއަނެއްހާ ޑޮލަރު ހަރަދުވާނެ ކަމަށާއި، ތައްޔާރުކުރި ޕްރޮޕޯސަލް އަށް ބޭނުންވާ ފައިސާ ހޯދަން މިހާރު ސަރުކާރަށް ހުށަހަޅާފައިވާނެ ކަމަށެވެ. އަދި ސަރުކާރުން ފައިސާ ހަމަޖެއްސުމުން މިނިސްޓްރީން ފަރުނީޗަރު ގެންނަން ބަޔަކަށް ހަވާލުކުރާނެ ކަމަށާއި، އަންނަ ރޯދަ މަހަށް މިސްކިތް ހުޅުވޭވަރު ވާނެ ކަމަށެވެ.
ސީދާ ތާރީޚެއް ވިދާޅުވާން ދަތިކަމަށާއި، އެހެންނަމަވެސް ކޮވިޑްގެ މި ހާލަތުގައި ސަރުކާރުން އެހާ ބޮޑު އަދަދެއްގެ ފައިސާ އެއް ލިބޭނެ ގޮތާ މެދު ޑރ. އަހުމަދު ޒާހިރު ސުވާލު އުފެއްދެވިއެވެ.
