އިދިކޮޅު އެއްވުމުގެ ތެރެއިން ހައްޔަރުކުރި އެންމެން ދޫކޮށްލައިފި
އިދިކޮޅު ޕީޕީއެމް/ޕީއެންސީގެ ފަރާތުން ރޭ މާލޭގެ އެކި ސަރަޙައްދުގައި ބޭއްވި އިހުތިޖާޖުގެ ތެރެއިން ފުލުހުން ހައްޔަރުކުރި 11 މީހުން ދޫކޮށްލައިފިއެވެ.
އިދިކޮޅުގެ ފަރާތުން "އިންސާފު ކޮބާ؟" ގެ ނަމުގައި މާލޭގެ އެކި ސަރަޙައްދުގައި މުޒާހަރާ ކުރަން ފެށީ އިއްޔެ ހަވީރެވެ.
މާލެއާ ރަށްރަށުގައި ވެސް ބޭއްވި މިމުޒާހަރާ ރޫޅާލުމަށް ފުލުހުން ބާރުގެ ބޭނުން ކުރުމަށް ޕެޕަރ ސްޕްރޭ ވެސް ޖަހާފައިވެއެވެ. އަދި ބައެއް މީހުން ހައްޔަރު ވެސް ކޮށްފައިވެއެވެ. ހައްޔަރު ކުރި މީހުންގެ ތެރޭގައި އިދިކޮޅު ދެ ޕާޓީގެ ކައުންސިލު މެންބަރުން ވެސް ހިމެނެއެވެ.
ފުލުހުން ވިދާޅުވީ، އިދިކޮޅު މުޒާހަރާގެ ތެރެއިން އިއްޔެ ހައްޔަރު ކުރި އެންމެން ވެސް ރޭގެ ވަގުތެއްގައި ދޫކޮށްލާފައިވާ ކަމަށެވެ.
ރާއްޖޭގައި ކޮވިޑް-19 ފެތުރޭ މިންވަރު އަނެއްކާވެސް އިތުރުވަމުންދާތީ، ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ އެއްވުންތައް ބޭއްވުން މަނާ ކޮށްފައެވެ.
