ކަންގަނާ މިފަހަރު ދިމާކޮށްލީ ރިއާނާއާ
ބޮލީވުޑް ތަރި ކަންގަނާ ރަނައުޓް ފަހަކަށް އައިސް ފެނިގެން ދަނީ އަބަދުވެސް ކޮންމެވެސް ތަރިއަކާ ނުވަތަ މީހަކާ ޖައްސާލައިގެން، ޒުވާބުކުރަން ވަރަށް ފޯރި ހުންނަ ތަރިއެއްގެ ގޮތުގައެވެ. އެގޮތުން ބައެއް ސިޔާސީ ކަންކަމުގައި މީގެ ކުރިން ކަންގަނާ ބައެއް ތަރިންނާ އަރައިރުން ވެފައިވާ ތަން މީގެ ކުރިން ވަނީ ފެނިގެން ގޮސްފައެވެ.
އެންމެ ފަހުން ކަންގަނާ މިވަނީ އެމެރިކާގެ ޕޮޕް ސްޓާ ރިއާނާ (ރިރީ) އާ ވެސް ދިމާ ކޮށްލާފައެވެ.
ދަނޑުވެރިކަމާ ބެހޭ ގާނޫނަށް ގެންނަން އުޅޭ ބަދަލުތައް އަނބުރާ ގެންދިއުމަށް ގޮވާލާ އިންޑިއާގައި މިދިޔަ ނޮވެންބަރު މަހުން ފެށިގެން ދަނޑުވެރިން މުޒާހަރާ ކުރަމުން އަންނައިރު، ދާދި ފަހުން ރިއާނާ ވަނީ މިކަމާ ގުޅިގެން ޓްވީޓެއް ހިއްސާ ކޮށްފައެވެ. ދަނޑުވެރިންގެ އިހުތިޖާޖު ކަވަރު ކޮށްފައި އޮތް ހަބަރެއް ހިއްސާކޮށް ރިއާނާ ވަނީ އެވާހަކަަ ނުދައްކަނީ ކޮން ސަބަބަކާ ހުރެތޯ ސުވާލު ކޮށްފައެވެ.
ރިރީގެ މި ޓްވީޓަށް ކަންގަނާ ވަނީ ސަރުކާރު ވަރަށް ބޮޑަށް ދިފާއުކޮށް ވަރުގަދަ ރައްދެއް ދީފައެވެ. އެގޮތުން ކަންގަނާ ބުނީ އެވާހަކަ ނުދައްކަނީ އެއީ ދަނޑުވެރިން ނޫން ކަމަށް ވުމުން ކަމަށާއި އެއީ ޗައިނާ އިން އަޑީގައި އޮވެގެން ހިންގަމުން އަންނަ ޓެރަރިސްޓު ޖަރީމާއެއް ކަމަށެވެ. އަދި ކަންގަނާ ވަނީ ރިހާނާ އަކީ މޮޔައެއް ކަމަށް ދޭހަވާ ފަދަ ބަހުރުވަކުން ވެސް ވާހަކަ ދައްކާފައެވެ.
ކަންގަނާ ރިރީ އާ ދިމާކޮށްލުމުން ގިނަ ބަޔަކު ވަނީ އެކަމާ ގުޅިގެން ކަންގަނާ އަށް ވަރަށް ބޮޑަށް ފާޑު ކިޔަމުންނެވެ.
ދަނޑުވެރިންގެ މައްސަލައިގައި ދާދި ފަހުން ކަންގަނާ ވަނީ ޕަންޖާބު ލަވަކިޔުންތެރިޔާ ޑިލްދީޕު އާ ވެސް ދިމާ ކޮށްލާފައެވެ.
