ފުރާނަ ސަލާމަތް ކުރަން ވެކްސިން ޖެހުމަކީ ޒަރޫރީ ކަމެއް: ޝަހީމް
ފުރާނަ ސަލާމަތް ކުރުމަށްޓަކައި ވެކްސިން ޖެހުމަކީ ޝަރުއީ ގޮތުން ބަލާއިރު ޒަރޫރީ ކަމެއް ކަމުގައި، ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް މިފަދައިން ވިދާޅުވެފައި މިވަނީ ރާއްޖޭގައި ކޮވިޑް-19 ވެކްސިން ޖަހަން ފެށުމާ ގުޅިގެން އިދިކޮޅު ބައެއް ފަރާތްތަކުން ވެކްސިން ޖެހުމާ ދެކޮޅަށް އަޑު އުފުލަމުން އަންނަ ދުވަސްވަރެއްގައެވެ.
ޝަހީމް މިއަދު ކުރެއްވި ޓްވީޓެއްގައި ވިދާޅުވީ އިސްލާމީ ޝަރީޢަތުގެ އެންމެ މަތިވެރި އެއް މަޤުޞަދަކީ ފުރާނަ ސަލާމަތްކުރުންކަމުގައި ވީ ހިނދު، ނުރައްކާތެރި ބަލިމަޑުކަމުގެ ވަބާއިން ފުރާނަ ސަލާމަތް ކުރުމަށްޓަކައި ރައްކާތެރިކަމުގެ ފިޔަވަޅެއްގެ ގޮތުން ވެކްސިން ޖެހުމަކީ ޝަރުޢީ މަޤުޞަދުތަކުގެ ނަޒަރުން ބަލާއިރު ޟަރޫރީކަމެއް ކަމަށެވެ.
" ﷲ ގެ ޙަޟްރަތަށް ވަކީލުކޮށް ޞިއްޙީ މާހިރުންނަށް އިތުބާރުކޮށް ބަލިން ސަލާމަތްވުމުގެ ސަބަބުގައި ހިފުމުގެ ގޮތުން އެންމެހާ ރައްޔިތުން ކޮވިޑް19 އިން ސަލާމަތް ވުމަށް ޓަކައި ވެކްސިން ޖެހުމަކީ މުޅި މުޖުތަމަޢަށް ހޯދައިދެވޭނެ ރައްކާތެރިކަމެއް ކަމުގައި އަޅުގަނޑު ދެކެން." ދީނީ އިލްމުވެރިޔާ ޝަހީމް ވިދާޅުވިއެވެ.
މީގެ އިތުރުން ޝަހީމް ވިދާޅުވީ މި ނާޒުކު ނުރައްކާތެރި ޙާލަތުން އަރައިގަތުމަށްޓަކައި ޤައުމީ އެއްބައިވަންތަކަމުގެ ސަފުތައް ބަދަހިކޮށް ޤައުމު ރައްކާތެރި ބަނދަރަކަށް ގެންދިއުމަށް އެންމެން އެކީ ވަރުގަދަ ޢަަޒުމަކާއެކު މަސައްކަތް ކުރަން ޖެހޭ ކަމަށެވެ.
Ads by STO
