މަޑުއްވަރީގައި ފުލުހުންނާއި ސިފައިން ހާއްސަ އޮޕަރޭޝަނެއް ފަށައިފި
ރ. މަޑުއްވަރީގައި ސިފައިންނާއި ފުލުހުން ހާއްސަ އޮޕަރޭޝަނެއް ފަށައިފި އެވެ.
އެ ރަށުން ވާހަކަ ދެއްކި މީހުންނާ ހަވާލާދީ "ސަން" އޮންލައިންގައި ރިޕޯޓުކޮށްފައިވާ ގޮތުގައި ފުލުހުންނާއި ސިފައިން އެ ރަށުގައި ހިންގާ އޮޕަރޭޝަންގައި ފާސްކުރަމުން ދަނީ މީގެ ކުރިން ވެސް ހަރުކަށި ފިކުރުގެ މީހުންނާ ދެކޮޅަށް އެ ރަށުގައި ހިންގި އޮޕަރޭޝަނެއްގެ ތެރެއިން ފާސްކުރިގެ އެކެވެ.
ހަރުކަށި ފިކުރު އެންމެ ބޮޑަށް އޮތް ކަމަށް ބުނާ މަޑުއްވަރީގައި ފުލުހުން ވަނީ މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހުން ފެށިގެން ހާއްސަ އޮޕަރޭޝަންތަކެއް ކުރިއަށް ގެންގޮސްފައެވެ.
މަޑުއްވަރީގައި ހަރުކަށި ފިކުރު އޮތް މިންވަރު ހާމަވެގެން ދިޔައީ މިދިޔަ އަހަރު ދޯންޏެއްގައި ހިނގި މާރާމާރީއެއްގައި ޒުވާނަކަށް ވަޅިން ހަމަލާ ދިނުމަށް ފަހުގައެވެ. އޭނާ ސަލާމަތްވާން މޫދަށް ފުންމާލިއިރު އޭނާއަކީ އުމުރުން 13 އަހަރުގެ އަންހެން ކުއްޖަކާ އިނދެގެން ކަމަށް ބުނާ މީހެކެވެ.
އެކުއްޖާ ބަލިވެ އިނުމުގެ ސަބަބުން އޭނާގެ މައްޗަށް ދައުވާ ކުރުމަށް ހައްޔަރުކޮށްފައިވާއިރު އެކުއްޖާގެ މައިންބަފައިން ވެސް ވަނީ ހައްޔަރުކޮށް ދައުވާ އުފުލަން ފޮނުވާފައެވެ.
Ads by STO
