ރާއްޖެއިން ޙައްޖަށް މީހުން ގެންދިޔުމުގެ ތައްޔާރީތައް ހުއްޓުމެއްނެތި ދިޔައީ ކުރަމުން: އިސްލާމިކް މިނިސްޓްރީ
ރާއްޖެއިން ޙައްޖަށް މީހުން ގެންދިޔުމުގެ ތައްޔާރީތައް ހުއްޓުމެއްނެތި ދިޔައީ ކުރަމުން ކަމަށް މިނިސްޓްރީ އޮފް އިސްލާމިކް އެފެއާޒުން ބުނެފިއެވެ.
މިއަހަރު ދިވެހި ރާއްޖެއިން ޙައްޖަށް މީހުން ފޮނުވެން ނެތްކަން އިއުލާނު ކުރަމުން އިސްލާމިކް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ، ރާއްޖެއިން ޙައްޖަށް މީހުން ގެންދިޔުމުގެ ތައްޔާރީތައް ހުއްޓުމެއްނެތި ދިޔައީ ކުރަމުން ކަމަށާއި އެގޮތުން އެންމެ ފަހު ވަގުތު ހުއްދަ ލިބުނު ނަމަވެސް ދިވެހިން ޙައްޖަށް ގެންދިޔުމުގެ އިންތިޒާމުތައް ހަމަޖެއްސުމުގެ ކަންކަން ރޭވެމުން ދިޔަ ކަމަށެވެ.
ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް-19 ގެ ސަބަބުން ސައުދީ އަރަބިއާގެ ސަރުކާރުން ވަނީ މިއަހަރުގެ ޙައްޖަށް ހަމައެކަނި އެޤައުމުގައި ދިރިއުޅޭ ރައްޔިތުންނަށް އެކަނި ފުރުސަތު ހުޅުވާލައިފައެވެ. މިއީ މިފަދަ ނިންމުމެއް ސައުދީ ސަރުކާރުން ނިންމި ފުރަތަމަ ފަހަރެވެ.
ސައުދީ ސަރުކާރުން މިނިންމުން ނިންމުމުގެ ކުރިން ވެސް ބައެއް ޤައުމުތަކުން ވަނީ، ކޮވިޑުން ރައްކާތެރިވުމުގެ ގޮތުން، އެޤައުމުން މީހުން ޙައްޖަށް ނުފޮނުވުމަށް ނިންމާފައެވެ.
