ކޮވިޑުން އަރައި ގަނެވޭނީ އަދި 1 ބިލިއަން ރުފިޔާ ދައުލަތަށް ލިބިގެން: ރައީސް
ކޮވިޑުން އަރައި ގަނެވޭނީ އަދި 1 ބިލިއަން ރުފިޔާ ދައުލަތަށް ލިބިގެން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް އޮފީހުގައި މިއަދު ނޫސްވެރިންނާއި ބައްދަލުކުރައްވަމުން ރައީސް ވިދާޅުވީ ކުރިއަށް އޮތް ހަ މަސް ދުވަހަކީ ވަރަށް ބޮޑަށް ދަތިވެގެންދާނެ ހަ މަސް ކަމަށާއި ވިޔަފާރިތަކާއި އެހެންް ދާއިރާތަކަށް ވެސް ދަތިކަން ކުރިމަތިވެގެންދާނެ ކަމަށެވެ.
ކަންއެހެން އޮތުމާއެކު ރައީސް ވަނީ ވީހާ ވެސް އަވަހަކަށް އިގްތިސާދީ މަސައްކަތްތައް ފަށައިގަންނަން ޖެހޭ ކަން ފާހަގަކޮށްފައެވެ.
" ކުރަން އޮތް ކަމަކީ ފައިސާ ހޯދުން. އެކި ތަންތަނުން ފައިސާ ހޯދުން. އަޅުގަނޑަށް ލަފާ ކުރެވޭ ގޮތުގައި މިކަމުން އަރައިގަނެވޭނީ މަދުވެގެން 900 މިލިއަން ޑޮޮލަރު ނުވަތަ އެއް ބިލިއަން ޑޮލަރު ލިބިގެން." ރައީސް ވިދާޅުވިއެވެ.
ރައީސް ސޯލިހުގެ ވާހަކަފުޅުގައި ވަނީ ޗައިނާ އިން ނަގާފައިވާ ލޯނުތައް އެގައުމުން 4 ހަތަރު އަހަރަށް ވަނީ ލަސްކޮށްދީފައިވާ ކަންވެސް ފާހަގަކޮށްފައެވެ.
އެގޮތުން ރައީސް ވިދާޅުވީ ސަރުކާރަށާއި ކުންފުނިތަކަށް ޗައިނާ އިން ނަގާފައިވާ ލޯނުތަކުގެ ޖުމްލަ 1.6 ބިލިއަން ޑޮލަރަށް އަރާ ކަމަށެވެ.
" ޗައިނާ ސަރުކާރުން މިހާރު އަޅުގަނޑުމެންނަށް ޔަގީންކަން ދީފައިވަނީ ސަރުކާރުން ސަރުކާރަށް ނަގާފައިވާ ލޯނުތައް، އެއީ ގާތްގަނޑަކަށް 600 މިލިއަން ޑޮލަރު ހަތަރު އަހަރަށް ވަނީ ލަސްކޮށްފައި. މި އަހަރުގެ ތެރޭގައި ދައްކަން އޮތީ 100 މިލިއަން ޑޮލަރު" ރައީސް ވިދާޅުވިއެވެ.
Ads by STO
