ފެބްރުއަރީ މަހު ރާއްޖެއަށް ޒިޔާރަތް ކުރި ފަތުރުވެރިންގެ އަދަދު 50،000 އިން މައްޗަށް!
މި ހިނގާ ފެބްރުއަރީ މަހުގެ 10 ދުވަހާ ހަމައަށް ވެސް ރާއްޖެ އައި ފަތުރުވެރިންގެ ޖުމުލަ އަދަދު 50،000 އިން މައްޗަށް އަރައިފިއެވެ. އެގޮތުން މިމަހު 10 އަކާ ހަމައަށް ރާއްޖެ އައި ފަތުރުވެރިންގެ ޖުމުލަ އަދަދަކީ 50،989 އެވެ.
ޓުވަރިޒަމް މިނިސްޓްރީން އެންމެ ފަހުން އާންމުކުރި ތަފާސް ހިސާބުތަކުން ދައްކާ ގޮތުގައި، ޖަނަވަރީ މަހުގެ 1 ވަނަ ދުވަހުން ފެށިގެން މިމަހު 10 އަކާ ހަމައަށް ޖުމުލަ 121،694 ފަތުރުވެރިން ރާއްޖެއަށް ޒިޔާރަތް ކޮށްފައިވެއެވެ. އަދި އެ އެންމެން ވެސް ރާއްޖޭގައި މަޑުކޮށްފައި ވަނީ 9.1 މަސް ދުވަސް ވަންދެން ކަމުގައި ވެސް މިނިސްޓްރީން ހާމަ ކޮށްފައި ވެއެވެ.
މިއަހަރު ރާއްޖެއަށް އެންމެ ގިނަ ފަތުރުވެރިން އައިސްފައި ވަނީ ރަޝިޔާއިންނެވެ. އެގައުމުން މިއަހަރު 27،041 ފަތުރުވެރިން ޒިޔާރާތް ކޮށްފައި ވެއެވެ. އަދި ދެވަނަ އަށް އެންމެ ގިނަ ފަތުރުވެރިން ރާއްޖެއަށް ޒިޔާރާތް ކޮށްފައި ވަނީ އިންޑިއާއިންނެވެ. އެގައުމުން ރާއްޖެއަށް 26،292 ފަތުރުވެރިއަކު ޒިޔާރާތް ކޮށްފައިވާ ކަމުގައި މިނިސްޓްރީގެ ތަފާސް ހިސާބުތަކުން ދައްކައެވެ. މީގެއިތުރުން ޔޫކްރެއިންއިން 8،867 ފަތުރުވެރިއަކު ޒިޔާރާތް ކޮށްފައިވާއިރު ކަޒަކިސްތާނުން ރާއްޖެއަށް 5،848 ފަތުރުވެރިން ޒިޔާރަތް ކޮށްފައިވާ ކަމަށް ވެސް މިނިސްޓްރީގެ ތަފާސް ހިސާބުތަކުން ދައްކައެވެ.
